https://static.elcorreo.com/www/menu/img/zurekin-desktop.jpg

Speed trafikoan ari zen talde kriminal bat desegin dute Bizkaia eta Kantabrian

Ertzaintzaren patruila bat./
Ertzaintzaren patruila bat.

Ertzaintzak eta Guardia Zibilak elkarlanean egindako operazioan kokaina eta speeda zabaltzen zituen talde kriminal bat desegin dute.

PAUL PICADO

Ertzaintzak eta Guardia Zibilak elkarlanean egindako operazioan kokaina eta speeda zabaltzen zituen talde kriminal bat desegin dute. Antza denez, marihuana Europa iparraldeko herrialdeetan saltzen zuten, -irabazi handiagoak lortzen zituzten bertan-, eta substantzia horiek erosten zituzten gero diru horrekin. Horretarako, 'indoor' plantazio-sare bat sortu zuten Kantabrian eta Bizkaian, eta 5.600 landaretik gora zituzten bertan.

Bi fasetan garatutako operazioan 20 pertsona atxilotu dituzte (18 gizonezko eta 2 emakumezko), hiru ez beste guztiak espainiarrak dira, eta hiru horiek, berriz, Kolonbiarrak. Atxiloketak Bizkaian (8 Bilbon, 2 Arrigorriagan eta bana Ortuellan, Galdakaon eta Trapagaranen) eta Kantabrian (2 Boo de Pielagosen, 2 Santanderren, eta bana Arnueron, Castron eta Argoñosen) egin dituzte.

30.000 speed dosi egiteko adina substantzia (4.000 gramo speed eta 2.000 gramo kafeina) konfiskatu dute. Horrez gain, 1.000 gramo haxix, kilo erdi kokaina, 11 ibilgailu, 20.000 euro eskudirutan, 6,35 kalibreko pistola bat eta bere munizioa eta pistola detonatzaile bat ere aurkitu dituzte, besteak beste, ikerketarekin lotuta.

Marihuana plantazio handi bat

Ikerketa joan den udaren amaieran jarri zuten abian, agenteek susmatu zutenean Castro Urdialesen (Kantabria) bizi eta gerora Bizkaira lekualdatu zen pertsona bat speed eta kokaina salmentara bideratutako talde bateko buru izan zitekeela.

Gizon horren inguruan egindako zaintza-operazioari esker ikertzaileek jakin ahal izan zutenez, sarritan joaten zen Arnuero (Kantabria) udalerriko etxebizitza batera, eta bertan beste pertsona batzuekin elkartzen zen eta hainbat ordu ematen zituen egunean. Gerora jakin zuten etxe horren barruan marihuana plantazio handi bat zegoela, beste plantazio batzuekin lotura zuena, eta banaketarako eta salmentarako sare horren bidez finantzatzen zutela speed eta kokaina trafikoa.

Ikertzaileek beste hainbat marihuana plantazio aurkitu zituzten 'indoor', etxe eta nabetan, Arnueron, Guarnizon, Boo de Pielagosen (Kantabria) eta Ortuellan (Bizkaia).

Horietan 5.680 marihuana landare konfiskatu zituzten. Plantaziorik handiena, Kantabrian aurkitutako handiena dena, Arnueroko etxean aurkitu zuten, 3.400 bat landarerekin; eta Guarnizon eta Boo de Pielagosen 1.400 landare konfiskatu zituzten. Plantazio bakoitza zaintzeaz pertsona bat arduratzen zen, eta landareak azkar hazteko sistema konplexuak zituzten. Horietako batzuetan argindarrarekin iruzur egiten zutela ere hauteman da.

Otañes-Castro Urdialeseko (Kantabria) etxe batean marihuana plantazio handi bat jartzeko adina material topatu zuten agenteek. Material guztia berria zen, eta instalatzeko prest zegoen. Agenteek miaketak egin dituzte Bilbon, Galdakaon eta Etxebarrin ere, eta speed, kokaina, haxix eta dosiak prestatzeko substantzia gehiago, armak eta dirua aurkitu dituzte, besteak beste.

Ertzaintzako agente bat zaurituta atxiloketetan

Otsailaren amaieran aurreikusten zuen taldeak Logroñotik etortzekoak ziren bi pertsonari speed entrega bat egitea. Bilboko aparkaleku batean geratu ziren, eta droga jasotzen ari ziren unean atxilotu zituzten agenteek.

Hortik abiatuta, ikertzaileek taldearen burua eta droga ezkutatzeaz, garraiatzeaz eta saltzeaz arduratzen ziren gainerako kideak atxilotu zituzten.

Hala ere, Bilbon egindako atxiloketa-operazio batean, ertzain bat zauritu egin zen ibilgailu batek jota, gidaria poliziarengandik ihes egin nahian ari zela, eta ospitalera eraman zuten eta handik ordu batzuetara eman zioten alta.

Operazioa Santoñako (Kantabria) Lehen Auzialdiko eta Instrukzioko Bigarren Epaitegiak koordinatu du, eta elkarlanean garatu dute Kantabriako Guardia Zibileko Komandantziako Delitugintza Antolatuko eta Drogaren Aurkako Taldeko (EDOA) eta Castro Urdialeseko eta Laredoko Polizia Judizialeko taldeetako kideek eta Bilboko Ertzain-etxeko agenteek.

Temas

Euskera