https://static.elcorreo.com/www/menu/img/zurekin-desktop.jpg

Sopela Kosta Fest, ingurumenaren aldeko musika jaialdi jasangarria

Sopela Kosta Fest, ingurumenaren aldeko musika jaialdi jasangarria

Aurtengo edizioaren helburu nagusietako bat plastikoaren erabilera txikitzea izango da

UNAI SARRIUGARTE

Sopela Kosta Fest, ingurumenaren aldeko musika jaialdi jasangarria, irailaren 19tik 22ra bitartean ospatuko da. Hori dela bide, festibalak IHOBE erakunde publikoak martxan jarritako Erronka Garbia proiektuarekin bat egin du Sopelako hitzorduak, Nazio Batuen programa baten oinarrituta dagoena.

Mota honetako jaialdi batek ingurumenean sortu litzakeen eragin negatiboak murriztea eta parte-hartzaileen artean jarrera jasangarria sustatzea eta hedatzea da egitasmo honen xedea. Hori dela medio, ingurumenaren aldeko jardun egokiak identifikatuko dituzte jaialdiaren arduradunek, hauexek indartu eta alderdi negatiboak hobetzeko eredu izan daitezen.

Sopela Kosta Fest musika festibalaren seigarren edizioaren helburu nagusietako bat plastikoaren erabilera txikitzea da. Musika programa honek itsasoa eta ingurumenarekin lotura estua aurkezten du. Plastiko hauek itsasoko fauna nahiz florari kalte izugarria eragiten diete eta hau ekiditeko helburuarekin, edalontzi berrerabilgarriak eta biodegradagarriak erabiliko dituzte bertan.

Aurtengo jaialdiko kartelburuak Hesian eta El Canijo de Jerez taldeak izango dira. Gainera, bisitariek beste honako kontzertu hauez gozatzeko aukera izango dute: Cooper, Nerabe, Nogen, Natali, Lukiek eta Larry Birdek be, besteak beste.

Hesian talde nafarra izango da ostiraleko musika emanaldi garrantzitsuena. Zuriñe Hidalgo egongo da abeslari lanetan eta euren azken diskoko abestiak kanta zaharrekin uztartuko dituzte. Era berean, larunbatean El Canijo de Jerez igoko da oholtza gainera. Izan ere, 12 urtetan Los Delinquentes taldearekin jotzen egon ondoren Marcos del Ojo Barroso bakarlari lanetan hasi zen.

Bestalde, jaialdi honen seigarren edizioak kulturarekin, surfarekin eta hezkuntzarekin zerikusia duten hainbat jarduera eskainiko ditu: surf eta bodyboard ekitaldiak, skate ikuskizunak, kayak lasterketak etab. Gainera, euskal zirkuituko zenbait lehiaketa esanguratsu ospatuko dira bertan.