https://static.elcorreo.com/www/menu/img/zurekin-desktop.jpg

Siriako musika-eskoletan hemengo tresnak joko dituzte

Siriako musika-eskoletan hemengo tresnak joko dituzte

Musika Eskolak eta Mugarik gabeko Musikariak elkarteak sortutako Instrumentuen Bankuak 200 instrumentu bidali ditu  gerra zibila bizi duen herrialdeko musika eskoletara

AMALIA IBARGUTXI

Musikaren onurak ondo ezagutzen dituzte Luis Aranburu Musika Eskolako lehendakari eta zinegotzi Estíbaliz Cantok eta  Mugarik gabeko Musikariak elkarteko lehendakari Jesús María Alegría 'Pintu'-k. Horregatik, boluntario talde batek lagunduta, Siriara musika tresnak eramateko proiektua jarri dute martxan, eta 200 musika-tresnatik gora eta musikarekin lotutako beste 100 material bidaliko dute herrialde arabiarrera.

Dohaintzan emandako instrumentuak dira, eta Siriako musika eskoletara bidaliko dira zuzenean. Horiei esker «musikak ordeztuko du balen soinua», Pintuk adierazi duenez.

Musika Eskolak eta Mugarik gabeko Musikariak elkarteak sortutako Instrumentuen Bankuak aurreikuspenak gainditu ditu. Furgonetan Düsseldorferaino (Alemania) eraman, eta handik Iraken barrena Siriara bidean dira. Hasiera batean 50 instrumentu jaso zituzten. Azkenean, bidaia atzeratu eta 200tik gora izateraino heldu dira.

«Herritarrok askotan pentsatzen dugu arlo lokaletik ezin dela nazioarteko elkartasunerako tresnarik baliatu, baina argi erakutsi dugu egin daitekeela lan elkartasunaren alde eta bizikidetza arazoak dituzten gizarteen garapenaren alde, horri esker musika munduko txoko guztietara iritsi ahalko baita», nabarmendu du Estíbaliz Canto Luis Aranburu Musika Eskolako lehendakariak. Haren hitzetan, «arrakastak gure aurreikuspenak gainditu ditu».

Horietako batzuk banakoek bidali dituzte, esaterako, Valentziatik, baina Euskal Autonomia Erkidegoko beste eskola batzuetatik ere bidali dizkiete musika tresnak. Besteak beste, Bilbo, Donostia eta Iruñeko eskolak, eta Musika Eskolen Elkarteak, Bermeo, Erandio, Udaberria, Santurtzi, Ermua, Berriatua, Tobera, Zarautz, Galdakao eta Lekeitiotik.

«Ekimen hau 200 musika-tresna baino askoz gehiago da: musika arimaren adierazpena da, poza, tristezia eta sentipenak adierazten laguntzen baitigu, entzuten ari denaren arimarekin ere konektatzen duen aparteko lengoaia batean; orain, instrumentu horiek Siriako umeen bidaide bihurtuko dira, zeinek zailtasunak baitituzte musika hezkuntza jasotzeko, eta are handiagoak tresna bat erosteko. Poz horregatik merezi du emaileontzat instrumentuari uko egiteak ematen duen pena txiki hori», azpimarratu du Cantok.

Temas

Euskera

Contenido Patrocinado

Fotos

Vídeos