https://static.elcorreo.com/www/menu/img/zurekin-desktop.jpg

Sergio Saezek Giorgio Morandi margolariaren obrari buruz eginiko argazki erakusketa ikusgai Gernikako Euskal Herria Museoan

Sergio Saez./
Sergio Saez.

Erakusketaren helburu nagusia margolari italiar ospetsuaren obra hedatzea da

UNAI SARRIUGARTE

Sergio Saez artista bilbotarrak Giorgio Morandi margolariaren obrari buruz eginiko argazki erakusketa ikusgai dago Gernikako Euskal Herria Museoan. Abuztuaren 1ean irekiko dute bisitarientzat eta urrriaren 31 arte egongo da ikusgai. Erakusketaren helburu nagusia margolari italiar ospetsuaren obra hedatzea da.

Giorgio Morandi XX. mendeko italiar artista ospetsuenetarikoa da jende askorentzat. Eguneroko objektuak margotzen egin zen famatu. Edalontziak, botilak eta beste hainbat erreminta bere pintzeladen oinarri bilakatu ziren. Giotto, Masaccio, Uccello edota Paul Cezanne margolariak izan ziren bere erreferente.

Bere ibilbide artistikoan garaikur bat baino gehiago irabazi zuen. 1948ko Veneziako Bienalean saritua izan zen. 1956an, berriz, Sao Pauloko Bienalean margolariaren ibilbidea saritu zuten. Gainera, Federico Fellini zinemagile italiarraren «La Dolce Vita» luzemetraiean Morandiren hainbat obra daude erakusgai.

Sergio Saez artista bilbotarrari familiatik zetorkion profesioa jarraituz, argazkilaritza eta artea ikasi zituen. Argazki kamara erosi zuenean airean argazki batzuk atera ondoren argazkiek defektu bat zutela nabaritu zuen. Akats horietan interesaturik, urte bete eta erdi igaro zituen defektu horren kontrola menperatzen bukatu arte.

Argazki erakusketa honetan Giorgio Morandi margolari italiarraren obrari egiten dio keinu Sergiok Saezek. Eta argazkiek, Morandik bere lanetan egingo lukeen bezala natura hilari bizitza ematea lortzen dute. Asteotan Morandiren margoak ikusgai daude Bilboko Guggenheim Museoan.