Santiago Aldama, Espainiako etorkizuna
Harmailatik ·
Grizzlieseko hegal pibota kanariarra, NBAko hasieraren sentsazioetariko bat da
Santiago Aldama Toledo (Kanaria Handia, 2001). Bera da, beharbada, une honetan, Espainiako saskibaloian benetan axola duen izen bakarra. Garuba dago, noski, edo Geuertarrak (Margaritaren seme-alabak, alegia, Andrea ere izarra izan behar da nesken taldean), baina selekzioa nazioarteko lehen mailara itzultzea, ziurrenik, Grizzlies taldeko hegal-pibotaren eskuetatik pasatuko da. Santiago Aldama Espainiako etorkizuna da.
Jakina da Espainia dela Europako egungo txapelduna. Nola ahaztu dezakegu hori. Eta Willy Hernangómez izan zen txapelketako MVPa. Baina hori guztia irudipen bat besterik ez zen izan. Poz ezin handiagoa, noski, baina Team USAren bertsio onenari begietara begiratu ahal izan dion talde bakarraren beltxarga kantu bikaina besterik ez. Eurobasketa irabaztea ezustekoa eta poza izan da. Etorkizunean, ordea, gainerako taldeak berriro defentsan lan egitera bueltatuko dira. Jokoa errespetatuko dute, eta horretan, Espainiak ez du lehiatzeko aukerarik jokalari gazterik gabe. Espainiako saskibaloiaren etorkizuna Santi Aldama da. Europakoa ere, Wembayama edo Deni Avdijarekin batera.
Inoiz ez zuen ACBn debutatu eta beste bide bat hartu zuen. Madrilek Doncicekin bizi izan zuena ez da berriz gertatuko. Izar berriek ez dute Europako klub handietan jokatu nahi. Wembayamak, adibidez, hurrengo drafteko lehen postuan jartzen dutena, Bartzelonari ezetz esan zion. Minikopa batekin tentatu zuen, Madrilek Doncicekin egin zuen bezala. Frantsesak ez zuen klubean jarraitu nahi. Izan ere, egun, ez du Asvelen ere jokatzen. Parkerrena bere taldea da eta Euroligan ezagun egiteko aukera du Wembayanek, baina nahiago du Metropolitans klub txikian egon, eta partida gutxiago jokatu. Patxadaz.
Aldamak, jokalari profesionalen seme eta ilobak, ondo daki bide hori nola zeharkatu. Amateur aro osoa Canterbury eskola ospetsuan eman baitu, klub handietatik eta foku mediatikotik urrun. Iaz NBAra egin zuen jauzi. Lehen denboraldia G Leaguean eta udazken honetan, Espainiarekin Eurobasketa jokatzeari uko egin ondoren, NBAko sentsazioetako bat da.
Grizzliesek ezin du gehiago entretenitu. Ja Moranten eskutik, NBAk gaur egun duen jokalaririk interesgarriena, Memphisekoak zikloi bat dira, eta aingura aurkitzen dute hegal pibot espainiarraren presentzian. Defendatzen duen ia bakarra da eta.
