https://static.elcorreo.com/www/menu/img/zurekin-desktop.jpg

Santa Katalina Lorategi Botanikoak zenbait nobedade izango ditu aurten

Santa Katalina Lorategi Botanikoaren txoko bat./atlasplanet
Santa Katalina Lorategi Botanikoaren txoko bat. / atlasplanet

Besteak beste gaueko bisita antzeztuak eta ibilbide birtual bat eskainiko ditu

PAUL PICADO

Santa Katalina Lorategi Botanikoak aurten hainbat nobedade eskainiko ditu, hala nola, gaueko bisita antzeztuak, ibilbide birtual bat 360 gradutan ikusteko aukera ematen duen online tresna berri bat (euskaraz, gaztelaniaz eta ingelesez), eta bisita gidatu botanikoak.

Lorategi Botanikoa Tresponden dago, Gasteiztik hamabi kilometrora, eta larunbat honetan irekiko da. Iaz arrakasta handia izan zuen, izan ere, 15.750 pertsona baino gehiago bertaratu ziren, eta aurten, nobedadeekin jende gehiago erakartzea espero dute.

Besteak beste, tailer didaktikoak, jarduera astronomikoak eta kultura-ekitaldiak izango dira. Tailer didaktikoetan, esaterako, txokolate naturalak, janari osasungarriak eta tximeleten 'oasi' bat egingo dituzte.

Baina programaren jarduerarik garrantzitsuenetako bat, aurreko urteetan bezala, haurrentzako bisita antzeztuak izango dira. Hor, Katalina marigorringoak eta harekin doazen Romanix druidak, Vanesa tximeletak eta Velutino liztor gaiztoak Lorategi Botanikoaren historia eta barruan dauden loreak eta landareak azalduko dizkiete haurrei. Lorategia zabaltzen den egun berean, hots larunbatean, lehen bisita antzeztua izango da, 12:00etan, eta hortik aurrera, hilabete bakoitzaren lehen igandean izango dira bisitak, urrira arte.

Aurten gaueko bisita antzeztuak egingo dira, 22:00etan, ekainaren 22an, uztailaren 6an, abuztuaren 3an eta irailaren 7an. Gaueko bisitetan izar bat izango da jardueran parte hartzen dutenei azalpenak emango dizkiena, eta ibilbidea amaitutakoan kontzertu bat izango da Lorategian dagoen XIII. mendeko monasterio zaharraren ondoan.

Lorategi Botanikoa 10:00etatik 14:00etara egongo da irekita astelehenetik ostiralera, eta 11:00etatik 15:00etara, larunbat, igande eta jaiegunetan. Maiatzean, ekainean, uztailean, abuztuan eta irailean, berriz, 10:00etatik 20:00etara irekita egongo da.

Temas

Euskera