https://static.elcorreo.com/www/menu/img/zurekin-desktop.jpg

«'La Voz' irabaztea ez da inoiz nire asmoa izan»

Berta BitterSweet abeslari bilbotarra./
Berta BitterSweet abeslari bilbotarra.

Berta BitterSweet abeslari bilbotarra 'La Voz'- en parte hartu ondoren egunerokotasunera itzuli da

IZASKUN MOYANO

Begiak itxi eta bere ahotsa entzunda Harlemeko klub-etan abesten duen emakume beltza dela esan daiteke. Irekitzerakoan ordea, Edurne Zuri bezalako azal argi eta fina duela ikus daiteke. Musika soul-a abesten duen emakume beltzarana harrapatuta ote ile zuridun bilbotarraren barnean? Tele 5 kateko 'La Voz' saioan bere talentua erakutsi eta entzuleak aho bete hortz utzi ostean eguneroko bizitzara itzuli da Berta BitterSweet (Bilbo, 1985).

«Saioaren aurretik egiten nuen gauzak berdinak burutzen ditut egunotan ere», onartu du. Nolabait esateko «publizitate jauzi» moduko bat izan omen da. Zuzeneko eta bolo ugari eskaini ditu 'La Voz' saioan aurrera jarraitzen ez zuela esan ziotenetik hona. Batzuetan beste artista batzuen bertsioak abesten ditu, edota Tea Party DJ euskaldunekin batera aritzen da. «Une honetan kontzertuok alde batera utzi eta kanta berriak egiteari ekin nahi nioke».

Bere egunerokotasuna asko aldatu ez den arren, ezagunago bihurtu da herritarren artean. Zaleek kalean gelditu eta berarekin hitz egiten dute, argazkiak ateratzen dira, eta «autografoak eskatzen dizkidate», adierazi du harrituta. Horrez gain, Ballonti merkatal zentroko denda batean lan egiten du eta jarraitzaile ugarik berarengana hurbildu eta besarkatu egiten dute. Azken finean, «beraientzako musika egiten dut, ez neronentzat soilik».

Familiatik hurbil egotea atsegin duen gaztea da Berta. Honen harira, 'La Voz' saioa bikaina iruditu zitzaion bere ibilbide musikalari bultzadatxo bat emateko. «Asko ikasi nuen oso denbora gutxian». Izan ere, duela bost urte aurkeztu zen baina ez zuen arrakasta handirik izan. Aurten ordea, aurreko edizioan parte hartzeko deitu ziotenean Bertak dudarik gabe baiezkoa eman zien. Baina bilbotarrak ez zuen programan irabazle ateratzeko asmorik. Berea xedea ikastea eta esperientzia hura bizitzea ziren soilik.

«Aurrera jarraitzen ez nuela esan zidatenean publikoa asko haserretu zen; ni, ordea, batere». Oso pozik eta harro dago bertan bizitakoaz eta bere gidari gisa aritu zen Juanes abeslari kolonbiarraren aholkuak aintzat hartzen ditu beti. «Kameraren atzean dagoen taldea izugarria da». Izan ere, Berta asko harritu zuen produkzio, makillaje, errealizazio eta erregidoreen lanak. «Guztiok familia ginen».

Diva txikia

Haurra zenetik dutxan eta karaokean abestu izan du bilbotarrak. «Musika terapia moduko zerbait da niretzat». Baieztapen hau ez da zeharretara interpretatu behar. Izan ere, Bertak 14 urte zituela hezurretako minbizia pairatu eta aurre egin zion. «Abestea sendagaia izatetik mendean naukan droga da niretzat». Bilbotarraren aburuz ezin izango luke abeslaria ez den beste ogibiderik izan. Hilabetean behin abestuta pozik omen da.

«Betidanik izan naiz diva txikia» onartu du algaraka. Etxean musika beltza entzuten zuten maiz eta hortik datorkio, hain zuzen ere, abesteko grina. Hala eta guztiz ere, ez zen Novato izeneko reggae artista batek bere ahotsa entzun arte profesionalki abesten hasi. 26 urterekin zapaldu zuen lehendabizikoz Bertak eszenatoki bat. Hastapenetan, Novatoren korista gisa aritu zen Espainia osoan zehar. Ondoren, reggaeko artista bera izan zen Berta abestiak konposatzera bultzatu zuena.

Entzuleei asko gustatu zitzaizkien bere ahotsa eta baita bere abestiak ere. Horrez gain, familia osoaren babesa du eszenatoki gainera igotzen den bakoitzean. «Nire ama oso fan da, kontzertu guztietara etortzen da». Izan ere, beraiei esker oso etorkizun oparoa aurreikusten du bilbotarrak. «Helburu oso altuak jartzen dizkiot nire buruari eta guztiak betetzeko asmoa dut». Bertak dantzariz betetako taula gainean egotearekin amets egiten du, bere banda propioarekin abestiak interpretatzen dituen bitartean. Eta bere izaerari esker ziur ametsok egi bihurtuko dituela.

Temas

Euskera

Contenido Patrocinado

Fotos

Vídeos