https://static.elcorreo.com/www/menu/img/zurekin-desktop.jpg

La Regadera taldearen kontzertua, gaur, Kubik aretoan

La Regadera taldea, kontzertuan./E.C.
La Regadera taldea, kontzertuan. / E.C.

Taldeak 'Dormir es de cobardes' lan berria atera du duela gutxi

PAUL PICADO

La Regadera taldearen kontzertua izango da gaur larunbatean Kubik aretoan. Taldeak 'Dormir es de cobardes' izeneko lan luzea atera berri du eta zenbait talderen kolaborazioak izan ditu, hala nola Vetusta Morla, La M.O.D.A eta Berri Txarrak. Aretoko ateak 22:00etan irekiko dituzte, eta kontzertua gutxi gorabehera handik ordubetera hasiko da. Sarrera erosi nahi izenez gero, hemen egin daiteke (6,5 euro, kudeaketa-gastuak barne), edo leihatilan (8 euro).

Taldea 2014ko urrian sortu zuten A kal y kanto izeneko taldeko kideek. Hamar urte zeramatzaten kontzertuak ematen eta taldea desegin zen. Guztira, 200 kontzertu baino gehiago eman zituzten eta talde ospetsuekin ere jo zuten. Beraz, taldea nolabait berria izan arren, kideek esperientzia handia dute musikaren munduan. Besteak beste, ska, reggae eta rock estiloak bateratzen ditu, ukitu latindarrekin.

Lehen abestia, taldearen izen bera duena, 2015. urtean grabatu, ekoiztu eta editatu zuten. Urte horretan bertan bigarren saria lortu zuten Burgosko Musikari Gazteen VI. Lehiaketan. Hurrengo urtean, apirilaren 2an, lehen diskoa kaleratu zuten, 'Para que la vida no pare' izenekoa, eta horri esker, hainbat areto bete zituzten, hala nola La Fábrica de Tornillos edp Espainiako plaza Miranda de Ebroko jaietan. Horrez gain, zenbait jaialdi garrantzitsutan parte hartu dute, hala nola Sonorama, eta Manu Chao, La Raiz edo Celtas Cortos taldeen kontzertuetan ere parte hartu dute.

Duela bi urte bigarren diskoa kaleratu zuten, 'Trovadores' izenekoa, eta horrekin bira luzea egin zuten hainbat tokitatik (esaterako Iruñea, Las Palmas eta Kordoba) eta jaialditatik (Viñarock, Rabolagartija eta Juergasrock). Arrakasta handia lortu zuten lan horrekin, eta aurten, esan bezala, bere azken lana kaleratu dute. Lan landuagoa da eta ñabardura berriak sartu dituzte.