https://static.elcorreo.com/www/menu/img/zurekin-desktop.jpg

'Oihaneko kuadrila' filma euskaraz estreinatuko da hainbat zinema aretotan

Bizkaian, Bilbo, Barakaldo, Getxo, Leioa eta Portugaleteko zinema aretoetan ikusi ahal izango da

ELCORREO.COM

Zineuskadi plataformak bultzatutako Zinema Euskaraz programak 'Oihaneko Kuadrila' (Frantzia, 97') filma euskarazko bertsioan eramango du hainbat zinema aretotara gaur bertan. Zehazki, Arabako (Gasteiz eta Laudio), Bizkaiko (Bilbo, Barakaldo, Getxo, Leioa eta Portugalete), Gipuzkoako (Donostia) eta Nafarroako (Iruñea) zinema aretoetan ikusi ahal izango da, Zineuskadik jakinarazi duenez.

Annecyko animazioko zinemaldi entzutetsuan eta Sevillako jaialdiko Europa Junior atalean aurkeztu zuten 'The Jungle Bunch' filma ('Oihaneko Kuadrila'). David Alaux, Jean-François Tosti eta Éric Tosti zinemagileek sortutako, idatzitako eta zuzendutako 3Dko animaziozko seriea da 'Oihaneko kuadrila', baina orain formatu zinematografikora egokituta.

Txikienei «balio onak eta garrantzitsuak» erakusten dizkie, hala nola elkartasuna, adiskidetasuna eta taldearen indarra. Gainera, 'Indiana Jones', 'Mission: Impossible' eta 'Rocky' saga ezagunen erreferentzia zinematografiko dibertigarriak jasotzen ditu. Familia osoarentzako filmak oihanaren bihotzean bidegabekeriaren aurka borrokatzen duten animalien talde baten istorioa kontatzen du. Maurice tigre boteretsua dela uste duen pinguinoa da. Alboan izango ditu Junior semea, tigre-arraina, Miguel, gorila indartsu eta maitagarria, eta Batricia, iluntasunari beldur dion saguzarra.

Zinema Euskaraz programaren helburua kalitate zinematografiko ezaguna duten filmak herritarren esku euskaraz jartzea da. Horretarako, euskara erabiltzen da komunikazio kulturalerako tresna gisa, aisialdian euskararen normalizazioa bultzatuta. 2017an, programak 12 film bikoizten eta sustatzen laguntza eskaini du. Haietako asko dagoeneko estreinatuta daude, baina hurrengo hilabeteotan beste bi lan izango dira ikusgai: 'Early Man' eta 'Maya Erlea, Eztiaren Jolasak'.

 

Fotos

Vídeos