https://static.elcorreo.com/www/menu/img/zurekin-desktop.jpg

Nortzuk izan ziren Gasteizko emakume ezagunenak?

Nortzuk izan ziren Gasteizko emakume ezagunenak?

Emakumeek Gasteizko historiari egin dioten ekarpenaren balioa nabarmendu eta ikusarazteko ibilbidea sortu dute Andre Maria Zuriaren plazan hasi eta Hirigune Historikoa eta Zabalgunean zehar

AMALIA IBARGUTXI

Historiak memoria lausoa duela esaten da maiz, historia izaki biziduna balitz bezala. Baina historiak ez du memoriarik, historia ez delako bere kabuz sortzen. Iraganaren inguruko kontaketa eraiki egiten dute, sortu, historialari eta garaian garaiko gizarteko beste zenbait eragilek. Gasteizen, Udalak eta Enklabe kooperatibak historiaz gogoeta egiten hasi eta ikusi zuten hiriko emakumeak itzaletan geratzen zirela, ezkutuan ia. Horri buelta emateko, Hirigune Historikoa eta Zabalgunea zeharkatuko ditu ibilbidea antolatu dute ikasle taldeentzat.

Emakumeek Gasteizko historiari egin dioten ekarpenaren balioa nabarmendu eta ikusarazi nahi du ibilbideak, Andre Maria Zuriaren plazan hasi eta Hirigune Historikoa eta Zabalgunea zeharkatzen dituen bideak. Hor, zenbait leku eta eraikin erakutsiz, «emakume ugarik hainbat arlotan egindako ekarpen garrantzitsuak» ezagutarazten dituzte, hala nola «etxeko lanetan, ordaindutako lanetan, hezkuntzan, kulturan, artean, erlijioan, ikerketan, aisialdian eta politikan».

Espero dute horrek aukera emango duela historiaren kontakizuna gaurkotu eta modu «zorrotzago eta bidezkoagoan» errealitatea ezagutzeko. Helburutzat ezarri dituzte, zehazki, Gasteizko historian emakumeek izan duten zeregina ikusarazi eta aldarrikatzea; emakumeek Gasteizko historiari egin dioten ekarpena aitortzea eta ezagutaraztea; hiriko historiaren irakurketa hobetzen laguntzea; hiriko emakumeak non eta nola bizi ziren ezagutaraztea, baita zer lan eta ardura zituzten ezagutzera ematea ere; emakumeek historian izan duten parte-hartzea testuinguruan jartzea, kontuan izanik garai bakoitzeko ezaugarri historiko, artistiko, sozial eta politikoak; eta ikasleen artean pentsamendu kritikoa sustatzea historiak baztertutako emakumeen errealitatearen aurrean, jarrera hartu dezaten modu koherente eta aktibo batean, genero berdintasunari dagokionez.

Maiatzaren 30era arte egingo dituzte ikastaldeentzako bisitak. Bakoitza bere irakaslearekin batera joango da, eta 21 ikasletik gorakoa baldin badira, taldea bitan banatuko dute. Andre Maria Zuriaren plazan hasiko da bi orduko ibilbidea. Gaztelaniaz eta euskaraz egin daiteke.