https://static.elcorreo.com/www/menu/img/zurekin-desktop.jpg

Nerea Mujika, Gerediagako presidentea: «Eskaintza anitza denez, belaunaldi guztiei transmititzen diegu»

Nerea Mujika, aurtengo kartelaren aurkezpenean./E.C.
Nerea Mujika, aurtengo kartelaren aurkezpenean. / E.C.

Presarik gabeko bisita planifikatua egitea aholkatzen du

NAHIKARI CAYADO

Nerea Mujikak hamalau urte daramatza Gerediaga Elkartearen lehendakari lanetan. 53. edizioa hastear dago eta antolatzaileak azken txanpan sartuta dabiltza buru-belarri. Mujikak argi uzten du Azoka antolatzea ez dela batere lan erraza, horregatik gune guztietako ordezkarien profesionaltasuna goraipatzen du ahal duen guztietan.

-Hamalau urte daramatzazu elkarteko lehendakari. Zer nabarmenduko zenuke urte hauetan guztietan?

-Euskal Liburu eta Disko Azoka izatetik, Durangoko Azoka izatera pasatu zenean bizi izan genuen eraldaketak zeresan handia ekarri zigun. Koordinazio mahai bikain bat eratu genuen eta euskal kulturak behar zituen behar guztietara egokitzen ahalegindu ginen gune guztietako arduradunekin batera, eta aldi berean, pertsona guztietara transmititzea geneukan helburutzat. Azokan bost egun hauetan sortzen den giroa itzela da. Salerosketak egitea esperientzia oso berezia da hemen, zuzenean sortzailearekin kontaktuan jartzen zarelako, eta ez bakarrik Landakon kokatutako estandetan, gune bakoitzak bere aldetik lan egin arren, dena dago elkarlanean, lotuta.

-Beraz, gazteei kultura hurbiltzea ere erronka zenuten.

-Bai, eta formatu aldaketak izugarri lagundu zuen gure zalantzak argitzen. Orain eskaintza anitza denez, belaunaldi guztiei transmititzen diegu. Txikitan gurasoekin Saguganbarara doanak, hamar urte barru, lagunekin Ahotseneara joango da eta gero seme-alabekin itzuliko da… Horrela eboluzionatzen du Azokak kultura eta gizartearekin batera. Hori barrutik bizitzea oso esperientzia polita da.

-Euskal kulturak urtean zehar beste bultzadaren bat behar duela uste duzu?

-Bai. Sortzaileak ezin dira bizi bost egunetan egiten den lanaz bakarrik. Esan dezagun Azokak erakusleiho papera ere egiten duela, hau da, baliteke norbaitek produkturen bat ikustea Azokan, musika talde bat edo bestelako sortzaile baten lanen bat, eta urtean zehar erostea beste tokiren batean. Baina lan asko dago oraindik egiteko. Guk horri laguntzeko sortu genuen Sormen Beka, aurten literaturan oinarrituta dagoena.

«Asko gustatzen zait ezagutzen ez ditudan sortzaileak ezagutzea»

-Zein da zure gunerik gogokoena?

-Egia esan, Azoka egunetan buru-belarri nabil lanean, baina libre nabilen tarteetan gune guztietatik pasatzen saiatzen naiz, ikasi egiten dut. Saguganbaran asko emozionatzen naiz, nahiz eta umerik ez izan dagoeneko. Ahotsenean, Szenatokian, Irudienean… Asko gustatzen zait ezagutzen ez ditudan sortzaileak ezagutzea. Norekin nagoen, toki batera edo bestera noa, baina esan beharra daukat primerakoak direla denak.

-Zer gomendatuko zenioke Azokara lehenengo aldiz datorren bati?

-Aldez aurretik gure webgunea bisitatzea eta bertan zer programazio dagoen ikustea aholkatzen diot. Oso era argian eta zehatzean azalduta daude gure ekintza guztiak.

Plan bat prestatzea beharrezkoa ikusten dut, bidaia bat izango balitz bezala. Ziurrenik egun bat baino gehiago beharko dutelako dauden ekintza guztietan gozatzeko. Gainera, era desberdin batean disfrutatzen da Azokaz konpainiaren arabera, familian, lagunartean… Beraz, nire gomendioa da presarik gabeko bisita planifikatua egitea.

Durangoko Azoka 2018

 

Fotos

Vídeos