https://static.elcorreo.com/www/menu/img/zurekin-desktop.jpg

Nerabe, Meridian eta Kalakan taldeak izango dira BIME eta Womex jaialdietan, euskal musikaren ordezkari

Meridian taldeko kideak./
Meridian taldeko kideak.

Basque Music ekimenaren enbaxadore izateko hautatu dituzte, «etorkizuna duten artista berri bezala», eta horregatik, urriaren 25 eta 26an, Bilbo eta Kanaria Handiko Las Palmasen egingo dituzte kontzertuak, hurrenez hurren

AMALIA IBARGUTXI

Bilboko Bizkaia International Music Experience (BIME) jaialdia eta Womex jaialdia, Kanaria Handiko Las Palmasen, hiru euskal talderen erakusleiho izango dira: Nerabe, Meridian eta Kalakanek egingo dituzte kontzertuak bertan.

Basque Music ekimenaren enbaxadore izateko hautatu dituzte, «etorkizuna duten artista berri bezala», eta horregatik izango dira nazioarteko musika ekitaldi horietan. Urriaren 25ean, ostegunean, izango da, Bilborock aretoan BIME City deritzona, eta bertan izango dira Nerabeko donostiarrak eta Meridian talde bilbotarra, 'showcase' batean. 2017an, Melenas eta Los Brazos taldeak aritu ziren emanaldi horretan.

Nerabe bost lagunek osatutako taldea da. Sara Zozaya (ahotsa eta teklatuak), Ruben Ramos (gitarra eta teklatuak), Xabier Arratibel (gitarra eta teklatuak), Borja Iriarte (bateria) eta Iñigo Ozaeta dira kideok, Adrenalized, Cohen, Blaka eta The Animal Within taldeetan ibilitakoak, besteak beste. Pop-rock doinuak jorratzeko elkartu ziren. Meridiani dagokionez, Raul De Paz, Borja Gomez eta Alain Diezek osatutako rock taldea da.

BIME Pro atal profesionalean, bestalde, 'speedmeetings' saio bat prestatu dute euskal musikari profesionalentzat, urriaren 25ean ere bai. Bertan, BIMEn izango diren estatuko eta nazioarteko enpresa eta eragileei euskal musika-eskaintza aurkeztuko dizkiete, eta euskal artistei eta enpresei nazioartera zabaltzen lagunduko diete, Euskal Herriko eta nazioarteko profesionalen arteko topaketa horretan.

Hurrengo egunean, ostiralean, hilak 26, Kalakanen txanda izango da, World Music Expon (Womex), munduko musika-profesionalen bilera handian. Iparraldeko hirukoteak offWomex programazioaren baitan eskainiko du bere kontzertua, Gabriel Rodó aretoan, 21:00etan. Horrela, Kalakanek Juan Mari Beltrani hartuko dio lekukoa, bera izan baitzen iazko gonbidatua.

Hiru kantari perkusionistak osatzen dute Kalakan: Pierre, Xan eta Jamixelek. Kalakanek entzuleak eta musikariak biltzen ditu, beraien esanetan, «musikak emaiten dituen sentsazioen inguruan. Iraganaz harro eta errespetuz beteak, etorkizunari osoki zuzenduak». «Kultura milenario batean modernitatea orainean idaztea» dute helburu. XV. mendetik egunerainoko kantuak eskeintzen dituzte, «mendeetan garaikideak izan diren eta izen esoterikoak dituzten hainbat instrumentu tradizionalekin batera: txalaparta, txirula, tobera, pandero, xilintx… eta Indiatik etorritako harminioa».

Ohiko moduan, Basque Musicek stand propioa izango du Womexen, parte-hartzaile euskaldunen eskura. Iaz jarri zuen martxan BIMEk, erakusleiho modura, elkarlanok.

Temas

Euskera

Contenido Patrocinado

Fotos

Vídeos