https://static.elcorreo.com/www/menu/img/zurekin-desktop.jpg

Mugaz gaindiko langileentzako informazio ataria sortu dute

Mugaz gaindiko langileentzako informazio ataria sortu dute

Akitania Berria-Euskadi-Nafarroa euroeskualdean 3.900 pertsonak egunero igarotzen dute muga lanera joateko. Langile eta langabeentzat informazio baliagarria partekatzeko balio du www.empleo-info.eu atariak

AMALIA IBARGUTXI

Mugaren alde bietara bizi eta lan egiten duen jendearentzako baliagarria izango den ataria sortu dute. Akitania Berria, Euskadi eta Nafarroak osatzen duten euroeskualdeak, Europako Enplegua proiektuaren barruan, hiru lurraldeetako langile eta langabeentzat informazio baliagarria partekatzeko web atari berria jarri du martxan, mugaz gaindiko benetako enplegu-arroa sortzeko proiektuaren baitan.

Ostatua, bizitokirako baldintzak, kontrataziorako baldintzak, negozio-irekierak edo bankuko kontuak, garraioa, hizkuntzetan prestakuntza, bekak, mugikortasun-baliabideak ikasleentzat edota unibertsitate tituluen baliozkotzean laguntzeko balio du atariak.

Lan baldintzen arabera, informazioa bilatzeko hiru atal aurkituko ditu erabiltzaileak. Enplegu-eskatzailearen sekzioan, lurralde bakoitzeko enplegu-kualifikazioaren informazioa aurki daiteke, eta erabiltzaile bakoitzari dagokion eskualdeko entitate eta erakunde interesgarrietara loturak atxikitzen ditu.

Mugaz gaindiko langileei, lurralde bakoitzeko lan- eta gizarte-eskubideei eta zerga-betebeharrei buruz informazioa ematen die. Interesezko loturak ditu eta dokumentuak jaisteko aukera ematen du, kontratu-motei buruzko dokumentuak kasu. Norberaren konturako langileentzako, azkenik, hiru eskualdeetako batean negozioa jartzeko baldintzei, langileen joan-etorriei eta kontratazioko eskakizunei buruz informazioa ematen du.

Albisteak eta informazio orokorra

Halaber, atal espezifiko bat dauka Euroeskualdeko hiru hizkuntzetako bat ikasi edo non hobetu jakiteko, ikasleen mugikortasunari, eta bekei eta enpresetan praktikaldiak barne hartzen dituen lanbide-heziketari buruzko aspektu ezberdinak erakusten ditu baita ere.

Orokorrean, albisteak, harremanetarako atala eta proiektuari buruzko informazioa biltzen ditu plataformak.

2017an egin zen mugaz gaindiko enpleguaren lehen azterketak agerian utzi zuen Euroeskualdeak bazuela mugaz gaindiko enplegu-arroa sortzeko ahalmena. Akitania Berria-Euskadi-Nafarroa euroeskualdean 3.900 pertsonak egunero igarotzen dute muga lanera joateko.

Azterketak, halaber, agerian utzi zuen langileek hizkuntzaren, zergen eta garraioen aldetik milaka oztopo izaten dituztela. Bestalde, ikusi zuten hiru eskualdeetako enplegua hazi egingo dela urteotan, eta badirela zenbait sektore eta jarduera-eremu «baterako apustu eta aukerak sortzeko», hala nola fabrikazio aurreratua, energia berriztagarriak, osasuna, nekazaritzako elikagaien sektorea eta sormenezko industriak.

Temas

Euskera