https://static.elcorreo.com/www/menu/img/zurekin-desktop.jpg

Mondragon Unibertsitateak Ingeniaritza Mekatronikoko Gradua eskainiko du Bizkaian

Somorrostro Prestakuntza Zentroarekin hitzarmena sinatu du eta bi ikastetxeotako irakasleek elkarlanean jardungo dute gradua ematen 2020-2021 ikasturtetik aurrera

EL CORREO

Mondragon Unibertsitateak eta Somorrostro Prestakuntza Zentroak lankidetza hitzarmena izenpetu zuten astelehenean, Bizkaian Ingeniaritza Mekatronikoko Gradua eskaintzeko helburuarekin. Akordioaren arabera, bi ikastetxeotako irakasleek elkarlanean jardungo dute, 2020-2021 ikasturtetik aurrera Ingeniaritza Mekatronikoa ematen, etengabeko prestakuntza modu koordinatuan eskaintzen eta ikerketa proiektuak eta enpresei zuzendutako transferentzia proiektuak gauzatzen.

Juan Maria Palencia Mondragon Goi Eskola Politeknikoko zuzendariak eta Joseba Segura Somorrostro Prestakuntza Zentroa partaide duen Marcelo Gangoiti Fundazioko presidente eta Bilboko Elizbarrutiko gotzain laguntzaileak sinatu zuten hitzarmena. Eta Cristina Uriarte Eusko Jaurlaritzako Hezkuntza sailburua ere bertan izan zen.

Azaldu zutenaren arabera, hitzarmenaren ondorioz, Mondragon Unibertsitateak eta Somorrostro Prestakuntza Zentroak «profesionalei zuzendutako etengabeko prestakuntzako programak» ere sortuko dituzte, bi ikastetxeetako irakasleek irekian edo eskaripean emango dituzten tituluen bidez. Inguruko «enpresen interesei eta jarduerei jarraiki diseinatuko dira programak, teknologiaren alorrean betiere».

Era berean, ikerketaren eta ezagutza-transferentziaren alorrari dagokionez, Bilbo Handiko enpresek «ezagutza teknologikoan dituzten beharrak antzematen» lagunduko du akordioak, bai eta behar horiei erantzuteko «ikerketa eta transferentzia jarduerak» martxan jartzen ere.

Prestakuntza zikloetako zein batxilergoko ikasleei zuzenduta

Mondragon Unibertsitateak 2017-2018 ikasturtean eskaini zuen lehen aldiz, eta tituluak «erabateko arrakasta» izan du geroztik. Gaur egun, 79 ikasle ari dira gradua ikasten Goi Eskola Politeknikoan, Arrasateko campusean.

Goi mailako prestakuntza zikloetako ikasleei zein batxilergoko ikasleei dago zuzenduta, baina egin beharreko ibilbideak desberdinak dira kasu batean eta bestean. Prestakuntza zikloetatik datozen ikasleek unibertsitateko hiru ikasturte egin behar izaten dituzte, aurreko ikasketetan lortutako konpetentziek eskola urte baten adinako balioa baitute. Aldiz, batxilergoko ikasleek 4 urteko ikasketak egin behar dituzte gradua burutzeko.

Temas

Euskera