https://static.elcorreo.com/www/menu/img/zurekin-desktop.jpg

Mikel Urdangarin eta Eñaut Elorrietaren musika emanaldia, Bilboko Euskal Museoan

Mikel Urdangarin./
Mikel Urdangarin.

Zornotarraren kontzertua larunbatean izango da. Gernikako abeslariarena, berriz, ekainaren 8an

UNAI SARRIUGARTE

Mikel Urdangarinek eta Eñaut Elorrietak musika emanaldia eskainiko dute Bilboko Euskal Museoan. Zornotzar abeslariaren kontzertua larunbatean, ekainaren 1ean, izango da. Urdangarin Nika Bitchiashvillirekin batera ibiliko da oholtza gainean. Elorrietak, berriz, ekainaren 8an joko du Euskal Museoan, Harian proiektuarekin elkarlanean.

Kontzertuak Bizkaiko erakundearen Klaustro estalian ospatuko dira arratsaldeko zortzietan etaeuskal musika garaikidea zabaltzea izango dute helburu. Bizkaiko Foru Aldundiaren eta Bilboko Udalaren laguntza jaso dute.

Sarrerak jada salgai daude Bilboko Euskal Museoan. Helduentzako tiketak 10 euro balio dute eta 25 urtetik beherakoek prezio berezia izango dute euskal kultura musikala gazteei hurbiltzeko asmoz (7 euro).

Bi kontzertuak akustikoak izango dira, eta Bizkaiko erakundeak bere klaustro estalian denboraldi honetarako kudeatu duen kultur programazio zabalaren osagarri izango dira. Hortaz aparte, euskara sustatzen duen espazioa da Euskal Museoa, euskal kulturaren erreferente dena. Euskal kulturaren buru dira baita ere Mikel Urdangarin eta Eñaut Elorrieta abeslariak.

Irakasle eta musikariak

Euskal Museoa leku egokia da kultura maite duen edozeinentzat. Ezagutzarekin, hedapenarekin, ikerketarekin lotuta dago eta, arduradunek diotenaren arabera, gizartearentzat garapen pertsonalerako leku izan behar du.

Mikel Urdangarin eta Eñaut Elorrieta euskal musika kulturan ospe handia bereganatu duten bi artista dira. Ibilbide luzea dute, eta, hainbat musikarirekin oholtza partekatzeaz ez ezik, grabazio-estudio ugaritan ere aritu dira.

Mikel Urdangarin Zornotzako kantautorea da. Irakasle ikasketak egin bazituen ere, bertsolaritzan hasi zen. Ondoren, musikaren bidea hartu zuen gitarra eta ahotsaz baliatuta. Hainbat bertsolari eta abeslari ospetsurekin ibili da agertokietan: Kirmen Uribe, Rafa Rueda, Bingen Mendizabal, Josu Zabala Ajuriagerra, Iñaki Aurrekoetxea, Arkaitz Estiballes edota Igor Elortza. 15 disko plazaratu eta beste hirutan kolaborazioak egin izan ditu.

Eñaut Elorrieta, berriz, Gernikako musika sortzaile eta abeslaria da. Fisika ikasketak egin eta urte askotan DBH eta Batxilergoko irakaslea izan da Durangon. Lugarri taldean hasi zen abeslari gisa eta ondoren, Jon Mikel Arronategi Exkixuko baxu-jotzailearekin elkarlanean, Ken Zazpi taldea sortu zuen Gernikan. Talde horrekin 8 disko argitaratu ditu. Bakarlari lanetan, berriz, bi.