https://static.elcorreo.com/www/menu/img/zurekin-desktop.jpg

Marte

Marte
Txani Rodríguez
TXANI RODRÍGUEZ

Laster posible izango dugula espaziora bidaiatzea entzuten dugu maiz. Gero eta hurbilago dago Marten turismoa egiteko aukera. Zientzia-fikzioaren paradigmak gauzatzear daude. Ni ez nintzateke espaziora joango bertigoa dudalako, eta espazioa gau zabal bat bezala irudikatzen dudalako. Gainera, batzuetan, boz-emaile asko Marten egon behar diren susmoa daukat. Esango nuke haiei eskaintzen dizkietela politikari askok beren mintzaldi eta hauteskunde-mezuak. Marteko boz-emaile horiek guztiak gizonezkoak dira, zuriak, heteronormatiboak eta toreroak. Inoiz ez direla gaixorik jartzen esango nuke, zeren eta osasun sistema publikoa ez zaie axola. Marten, gazteen hezkuntza ez du garrantzi handirik, eta ez dute ikastetxe eta unibertsitateen funtzionamenduari buruz hitz egiten inoiz. Marten oso lasai bizi behar dute denek, eta baliteke adindunik ez egotea zahartzaro duin bat aldarrikatzen ez dutelako.

Beste batzuetan, politikariak berak martetar izango ote diren galdetzen diot neure buruari. Hasiera batean, normalak dirudite, baina gauza arraroak egiten dituzte, esaterako, bozgorailu bat emango bagenie aldrebes hartuko lukete. Susmagarriak dira: begiratzen digute, baina ez gaituzte ikusten, entzuten gaituzte, antza, baina ez digute jaramonik egiten, eta euren irribarreak ez dira mundu honetakoak, begi-bistan dagoenez. Hauteskunde-kanpaina heltzen denean, beren espazio-ontziekin mugitzen dira, nik uste. Kanpaina batean kilometro asko egiten badituzte ere, inork ez du ikusi politikari bat zerbitzu-gune batean atseden hartzen, ogitarteko bat jaten.

Horrelako susmoek harrapatzen naute maiz, baina gehienetan pentsatzen dut Martera joateko pixka bat gehiago itxaron beharko dugula. Turistak ez dute Marte gentrifikatuko oraindik. Egia esan, turismo horretatik gertuena egon zitekeen jarduera Donostiara pintxoak jatera joatea izango zen. Konstelazioak ez ditugu ikusiko eta ez ditugu behar izango jantzi bereziak mikrokosmos horretan zehar ibiltzeko, baina pintxo-jaten ibiltzeko eta espaziora ateratzeko behar den aurrekontua antzekoa da. Nik, Donostia nahiago.

Temas

Euskera