https://static.elcorreo.com/www/menu/img/zurekin-desktop.jpg

Mari-Jose Azurmendik irabazi du Manuel Lekuona Saria

«Aitzindaria izan da soziolinguistika gaietan, eta psikosoziolinguistika deritzon jakintza-arloan espezializatu da

AMALIA IBARGUTXI

Mari-Jose Azurmendirentzat (Donostia, 1944) izan da aurtengo Manuel Lekuona Saria. Eusko Ikaskuntzaren erakunde zientifiko-kulturalak aditzera eman duenez, hizkuntzaren normalizazioari egindako ekarpena eta, orokorrean, egindako ibilbidearen aitortza gisa eman diote. Besteak beste, «aitzindaria izan da soziolinguistika gaietan, eta psikosoziolinguistika deritzon jakintza-arloan». Iaz Fermin Leizaola etnografoari eman zitzaion saria, eta orain bi urte Jean Louis Davant idazle eta euskaltzain zuberotarrari.

Azurmendi pozik agertu da aitortza hau dela eta, eta gaineratu du aurten beste bi errekonozimendu ere izan zituela: Euskalerriaren Adiskide izendatu du RSBAP delakoak, eta Euskaltzaindiak ohorezko euskaltzain izendatu du.

Eusko Ikaskuntzak adierazi duenez, «bizitza oso bat irakaskuntza eta ikerketari emana da» eta, emakume aitzindaria izan da hainbat arlotan; Beasaingo Alkartasuna Lizeoko lehen emakume zuzendaria izan zen, baita UPV/EHUko katedradun izatera iritsi den lehen emakumetarikoa ere. Soziolinguistika Klusterraren bultzatzaile eta sortzailetako bat ere izan zen.

Manuel Lekuona sarietarako hautagaiak sei izan dira, eta horietako bi, bizkaitarrak: Xabier Amuriza bertsolaria eta Agus Barandiaran trikitilaria. Hautagai taldea osatu dute Andres Iñigo euskaltzainak, Paulo Iztueta irakasle, ikerle eta idazleak eta Ana Izura artistak. Irabazlearen hautaketan hiritarrek eta epaimahai instituzionalak parte hartu dute. Eusko Ikaskuntzaren bazkideen bozkak %30eko pisua izan du azken emaitzan, Euskal Komunitate Globalarenak %10a, eta falta den %60a epaimahai instituzionalaren esku geratu da. Epaimahai instituzionala osatu dute Euskalerriaren Adiskideen Elkarteak, Euskaltzaindiak, Aranzadi Zientzia Elkarteak, Labayru Fundazioak, Jose Miguel de Barandiaran Fundazioak, Euskal Kultur Erakundeak, Vianako Printzea Erakundeak eta Eusko Ikaskuntzak berak.

Manuel Lekuona Saria 1983tik banatzen du Eusko Ikaskuntzak. Euskal kulturako eragile ezagunei ematen zaie, egindako lanaren aitortza modura. Izan ere, obra osoak interesa duenean ematen zaio hautatuari. Sarituak aukeratzeko balioespen-irizpideak lau dira: balio unibertsala, bizitzako ibilbidea, ekarpen adierazgarria egin izana euskal gizarte eta kulturari eta egindako obraren dibulgazioa.

Manuel Lekuona Saria jaso duten artean daude, adibidez, Jorge Oteiza, Jose Miguel de Azaola, Justo Garate, Bernardo Estornes, Carlos Santamaria, Jose Ignacio Tellechea Idigoras, Jose Ma Jimeno Jurio, Eugene Goyheneche, Micaela Portilla, Elias Amezaga, Menchu Gale, Antxon Aguirre Sorondo, Joan Mari Torrealdai, Fermin Leizaola edota Manuel Lekuona bera. Sariaren ikurra Remigio Mendiburuk sortutako brontzezko eskultura bat da

 

Fotos

Vídeos