https://static.elcorreo.com/www/menu/img/zurekin-desktop.jpg

Manu Leguineche, Federico Krutwig eta Zavala sendiaren funtsak jasoko ditu Euskadiko Artxibo Historikoak

Manu Leguineche./EFE
Manu Leguineche. / EFE

Zentroak Iñigo Urkullu lehendakariaren bisita jaso zuen atzo

ELCORREO.COM

Iñigo Urkullu Eusko Jaurlaritzako lehendakariak Euskadiko Artxibo Historikoa bisitatu zuen atzo, Bilbon, eta iragarri zuen Manu Leguineche kazetariaren eta Federico Krutwig idazlearen artxiboak eta Zavala sendiaren funtsak jasoko dituela ekaina eta iraila bitartean. «Dokumentu ondarea herri baten historia, kultura eta nortasunaren funtsezko zati bat da. Gure memoriaren ezinbesteko isla da», adierazi zuen atzo Urkulluk.

Urkulluren bisita bat etorri da asteburuan ospatu den Artxiboen Nazioarteko Egunarekin. Harekin egon dira Kultura eta Hizkuntza Politikako sailburu Bingen Zupiria, Kultura sailburuorde Joxean Muñoz, Kultura Ondarearen zuzendari Mikel Aizpuru eta Euskadiko Artxibo Historikoaren zuzendari Borja Aguinagalde.

Bere ateak duela lau urte ireki zituenetik, Euskadiko Artxibo Historikoaren funtsen kopuruak gora egin du etengabe. Urte honetan bertan, 1998an itxiarazi zuten 'Egin' egunkariaren funtsak jaso ditu. Egun, hainbat urtez Hernaniko erredakzioan utzirik egon ostean, funts horiek desinfektatzeko lanak gauzatzen ari dira eraikinean bertan.

Halaber, Kultura eta Hizkuntza Politika Sailak hitzarmen bat sinatu zuen apirilean Eusko Ikaskuntzarekin. Hitzarmenaren ondorioz, erakunde horrek bere funtsen zati bat Artxibo Historikoaren esku utzi du. Orain arte Eusko Ikaskuntzak kudeatu duen Gaur Eguneko Historiaren Agiri Dokumentuen Biltokiak azken lau hamarkadetan bildu dituen dokumentuak daude utzitako funtsean artean. Gainera, bere garaian euskal sendi eta elkarte ezberdinek Eusko Ikaskuntzaren esku utzi zituzten 30 bat dokumentu funts Artxiboaren esku utzi dira ere.

Funts berriak

Horiei guztiei gehituko zaizkie atzo iragarritako hiru dohaintza berriak. Manu Leguinecheren artxiboaren kasuan, Arratzuko kazetari eta idazleak bere bidaietan bildu zituen mundu osoko material ezberdinak jasoko dira. Horien zati bat Artxibo Hostorikoan dago jadanik, eta beste guztiak datozen asteotan iritsiko dira.

Federico Krutwig idazle, politikari eta euskaltzain getxoztarraren artxiboaren kasuan, bere alargunak eman duen artxibo pertsonala da. Zavala sendiari dagokionez, Euskadiko artxibo pribatu handiena da «dokumentazioaren bolumen, kalitatea eta aniztasuna dela eta»: XV. mendeko hastapenetatik 1950era arte bildu izan diren funtsak.

Funts horiek guztiak Artxibo Historikora oraindik iritsi ez badira ere, Urkulluk beren edukiaren zati bat ezagutzeko aukera izan du. Artxiboaren zuzendari Borja Aginagaldek 1936ko Eusko Jaurlaritzari loturiko dokumentu batzuk edo Juan Sebastian Elkanoren 1522ko jatorrizko dokumentuak erakutsi dizkio.

Contenido Patrocinado

Fotos

Vídeos