'It 's Magic!' Beti galdu arren, Orlandoko zaleak pozik daudela dirudi

Gutxik hitz egiten dute beraiei buruz, baina NBAko izarren hurrengo belaunaldia dira. Moranten, Youngen, Doncicen edo Townsen ondorengoak. Urte batzuk barru izango da hau. Doncid eta konpania ligako botereari egindako erasoa sendotzear dute oraindik.

Mutiko berriek Banchero, Wagner, Bol Bol, Holmgren eta Jabari Smith dute izena. Lehen hirurek, eta hori da interesgarriena, talde berean jokatzen dute, Orlando Magic taldean. Floridakoek, gainera, hurrengo draftaren lehen txandan hautatzeko hiru aukera dituzte. Hau da, Victor Wembanyama taldera batuko dutela uste dugu askok.

Agian horregatik zaleei ez zaie axola taldeak galtzeak. Eta Luis Aragonések esandakoaren kontrara: hauek galdu, galdu eta berriro galtzera ohitu dira. Zenbat eta okerrago, orduan eta aukera gehiago drafteko lehena aukeratzeko. Arazoa da partidak nahita galtzea legez kanpokoa dela. Urteko polemika...

Egia esan, Jamahl Mosleyk entrenatzen duen taldeak, porrotez aparte, benetan ondo jokatzen du. Oso boskote gaztea da, eta aurkariak gainditu egiten dituzte. Ausartak dira eta merezi du euren partidak ikustea.

Balio handiko hiru zutabe ditu Orlandok:

Paolo Banchero: Izen eta jatorri italiarreko Seattleko hegal pibota. 19 urte ditu eta gogor sartu da NBAn, 27 puntu, 9 errebote eta 5 asistentziarekin estreinatu baitzen. Historiako hirugarren jokalaria da 25-5-5eko partida batekin debutatzen, Kareem Abdul-Jabbar eta LeBron Jamesen ondoren. Bere lehen bost partidetan 20 puntu edo gehiago sartu zituen guztietan. Hori 1994tik ez zuen inork lortu. Grant Hill izan zen azkena duela 28 denboraldi. Hau egindako beste bostak Wilt Chamberlain, Elvin Hayes, Oscar Robertson, Dominique Wilkins eta John Williamson dira. Bancherok Duke unibertsitatean urtebete besterik ez zuen behar izan profesionaletara jauzi egiteko

Franz Wagner. 21 urteko hegaleko alemaniarra Eurobasketeko sentsazioetako bat izan zen. Selekzioaren jokoaren zati handi bat bere eskuetatik pasa zen. Jakina, Schröder zen izarra, baina zentzua eta energia NBAko bere bigarren denboraldian dagoen tiratzaile gazteak ematen zizkion. Iazko ikasturtean, debuta egin zuten onenen bostekoan hautatuta amaitu zuen.

Bol Bol, Manuteren semea. Ospea familiaren gauza da. Gainera, saskibaloian ondo jokatzen du. Batzuek ezetz diote: prentsaren gauza besterik ez dela, norbaiten sema izateagatik... Izan ere, orain arteko zenbakiak txarrak dira. Minutu gutxi, talde asko. Baina inoiz superizarra ez bada ere, beste maila batean jartzen duten gaitasun fisikoak ditu. 218 zentimetroko altuerarekin, eskutik eskura 234 zentimetroko tamainarekin, eta bere gorputzaren eta baloiaren erabilera ulertesin batekin, antolatzaile gisa jokatzeko ezaugarri ezin hobeak ditu.

Nork ez luke amestuko hiru hauei Wembanyama gehitzea? Banchero, 208 zentimetrokoa, Kevin Duranten estiloko tipo bat; Wagner, 2,08 ere bai, kantxaren bi aldeetan funtzionatzeko berezko gaitasuna duena, eta Bol Bol: etorkizuna izango denari keinua (oso tipo altu eta koordinatuak) eta baita iraganari, nola ez, belaunaldi oso batek Manute Bol gogoratzean sentitzen dugun nostalgiaren oinordeko gisa. Manute, Bolen aita, 231 zentimetrorekin NBAn jokatu duen tiporik altuena da.

• Temas
• Euskera
• Harmailatik (Sergio Eguia)