https://static.elcorreo.com/www/menu/img/zurekin-desktop.jpg

Madeleine Rock taldea: «Disko berrian, instrumentuak bezainbeste landu ditugu ahotsak eta harmoniak»

Itzal, Gartx, Jago eta Beni, Madeleine taldeko lau kideak, irribarretsu./
Itzal, Gartx, Jago eta Beni, Madeleine taldeko lau kideak, irribarretsu.

'Su hura' hirugarren diskoan, ahotsari orain arte ez bezalako garrantzia eman diote

IRAITZ URKULO

Lau lagunek osatzen dute 'Madeleine' taldea: Gartxot Unsain, Itzal Uranga, Jagoba Salvador eta Iñaki Benito. Hiru urteko geldiunearen ostean, 'Su hura' plazaratu dute, zazpi abesti berri biltzen dituen diskoa. Hartan, honezkero taldearen bereizgarri diren ezin konta ahala efektu erabili dituzte, eta intentsitate eta atmosfera aldaketen bidezko jolasari eutsi diote. Oraingoan, ordea, melodiak hitzez janztera ausartu dira. Haien ibilbideko proposamenik biribilena da emaitza; ez da harritzekoa, beraz, aditu eta entzuleengandik jasotzen ari diren harrera beroa.

-Bost urte igaro dira 'Mugarri' diskoa kaleratu zenutenetik. Zertarako balio izan dizue denbora horrek?

-Tarte honek gauza askotarako balio izan digu. Lehenik, taldekide baten osasuna lehenesteko eta beharrezko atsedenaldia hartzeko. Bestetik, abestiak lantzeko prozesuaz inoiz baino gehiago gozatzeko. Eta, azkenik, gure esfortzuak eta ilusioak gauzak ondo egitea merezi zutela ohartzeko.

-Kutxa Kultur Musika beka bultzada handia izan da, ezta?

-Bai. Azken orduan eta erdi txiripaz aurkeztu ginen, eta hura jaso genuenean kosta egin zitzaigun bekaren garrantziaz jabetzea. Izugarria izan da lehen aldiz hain baldintza oneko lokal bat izatea, eta baliabideek ere lagundu digute grabazioa zein bestelakoak orain arte egin ez genuen mimoz lantzen. Kutxaren logoaren motxila sentitu dugu zenbaitetan (burokrazia eta abar), baina eskertuta gaude eta uste dugu aukera aprobetxatu dugula.

-Nola definitzen duzue zuen musika? Zein generotan edo zer etiketapean sailkatuko zenukete?

-Estiloaz harago, gure musika pasioz beterikoa da, bidean entzundako iturri onenak hartu eta gure ikuspuntuarekin nahasten saiatzen gara. Joera aldakorrak ditugu, baina barrenak mugiarazten dituzten melodien zaleak izan gara beti. Talde instrumental gisa hasi ginen, hargatik genioen post-rock egiten genuela, baina zazpi abesti berri hauek gure gustuak zein zabalak diren ere erakusten dute, beraz, ez dakit, esan genezake pasio-rock edo egiten dugula.

-'Su hura' diskoaren konposizio-prozesua ezberdina izan da?

-Bai. Aurreko bi lanekin alderatuta izugarri landu ditugu abestiak, zati eta instrumentu bakoitza eta, lauron iritzietan galdu beharrean, denok ulertu dugu abestien esentzia zela garrantzizkoena. Oraindik tarte handia dugun arren, esperimentazioan ere aritu gara, orain arte erabiltzen ez genituen ahots, erritmo eta abesti egiturak landuz.

-Talde instrumental hutsa izateari utzi eta ahotsa erabiltzen hasi zarete. Zer eransten diete hitzek zuen melodiei?

-Denok maite dugu ahotsa taldean, baina bagenuen erreparo moduko bat eta, horregatik, ahots gutxi izan dira orain arte. Hirugarren saiakera honetan ahotsari garrantzia eman nahi izan diogu, eta instrumentuak bezainbeste landu ditugu ahots eta harmoniak. Hitzek gizatasun puntu bat ematen diote taldeari, geu ere hausnartzen duten pertsonak garelako. Gure galdera-ikurren isla dira.

-Zeren inguruan dihardute zuen abestien letrek?

-Gure biografia osatzen dute; egoera, oroitzapen, leku eta sentimen asko biltzen dituzte. Gure ibilbideari egindako omenaldi bat direla esango nuke, bide horrek sortu dizkigun zirraren argazki bilduma bat. Gaiak asko dira: laguntasuna, talde bat izatearen argi-ilunak, independentzia emozionala, frustrazio zein ilusioak...

Esperimentazioa

-Disko berriaren alderdi deigarrienetako bat txertatu dituzuen era guztietako soinu-efektuak dira.

-Beti izan gara efektu zaleak. Urteen poderioz teknika eta kuriositatea areagotzen joan dira, eta pedalak oinarrizkoak dira gure musika plazaratzeko; jolas horren oso zaleak gara. Ahotsera ere zabaldu dugu esperimentazio puntu hau eta ahots efektuekin jolasean ibili gara buruan genuen soinu hori ahalik eta modu ederrenean askatzeko.

-Intentsitatea eta atmosfera Madeleine taldearen bereizgarri dira, zalantzarik gabe.

-Asko gustatzen zaigu zati intimoago batetik hasi eta eztanda baterako bide hori. Efektuekin jolasten dugunean, atmosfera edo unibertso espazial hori da askotan helburua, baina baita erraien isla diren intentsitate handiagoko zati horiek lortzea ere. Bien arteko elkarbizitza eder horren oso zaleak gara.

-Oro har, zuen musikak kutsu epikoa du.

-Ez dakit epikoa den, baina eztandak asko gustatzen zaizkigu. Distortsioa beti izan dugu bidelagun, baina ikasi dugu hura gure barruko sentimenak transmititzeko moldatzen. Distortsiorik gabeko zati goxoak asko landu ditugu, eta intimitate hori ere epikoa izan daiteke.

«Era guztietako efektuekin jolasean ibili gara buruan genuen soinua ahalik eta modu ederrenean askatzeko»

«Distortsioa beti izan dugu bidelagun, baina ikasi dugu hura gure barruko sentimenak transmititzeko moldatzen»

-Orain arte estreinatutako bi bideoklipetan errealismotik eta interpretazio errazetatik aldendu zarete. Nola atzeman daiteke iruditan zuen musika-proposamenaren konplexutasuna?

-Lehen aldiz, arlo horretan esperimentatzen diharduen jendearekin lan egin dugu. Beraiek libreki egin dute interpretazioa, eta asko gustatu zaigu hirugarrengo batek gure musika oinarritzat hartuta sormenaz baliatu eta gauza ederrak sortzearen prozesu hori. Guk musika maite dugu, baina horren baitan dauden beste arte eta espresio motak ere bai. Interpretatzeko erraza ez den horrek burua martxan jartzen du, guk ez dugu erantzunik, baina musikak eta irudiek entzule eta ikuslearen pentsamenduan zerbait eragiten badute… hori gauza ederra da.

-Zer iruditzen zaizue 'Su hura' izaten ari den harrera?

-Espektatibarik gabe funtzionatzen eta gogo biziz aritzen den lagun talde bat gara. Lan handia egin dugu, eta harrotasun puntu bat sentitzen dugu jendeak gure lanari balioa ematen dionean. Guretzat ingurukoen harrera da garrantzitsuena, baina hedabide zein bestelakoen interesa piztu izanak ilusioa egiten digu. Gure prozesuaren zati handi bat elkar banatu dugu abesti batzuetan, eta su horrek zerbait berezia sentiarazi die zenbaiti. Musikak duen indarraz jabetu eta bidean merezi izan duen esfortzua egin dugula sentitzen dugu.

-Eta hemendik aurrera, zer?

-Hemendik aurrera bide beretik jarraituko dugu, bizitzak hala nahi badu. Azken urte honek asko irakatsi digu eta jabetu gara, saiatzeko prest egonez gero, gauzak ondo egiteko ahalmena dugula. Kontzertu bereziak eman eta abesti berriak sortzeko gogoz gaude. Erronka gosea dugu, beraz, izango duzue gure berri.

Temas

Euskera
 

Fotos

Vídeos