https://static.elcorreo.com/www/menu/img/zurekin-desktop.jpg

Loiuko aireportuak 600.000 bidaiarien langa gainditu du uztailean

Loiuko aireportuak 600.000 bidaiarien langa gainditu du uztailean

Euskal Autonomia Erkidegoko eta Nafarroako aireportuen bisitari kopuruak ere gora egin du nabarmenki

UNAI SARRIUGARTE

Loiuko Aireportuak 600.000 bidaiarien langa gainditu du uztailean. Hilabete bakarrean zifra hori gainditzen duen lehendabiziko aldia izan da. Era berean Euskal Autonomia Erkidegoko eta Nafarroako aireportuetan ere bidaiari kopuruak gora egin du nabarmenki. Miarritzeko (Lapurdi) aireportuan, berriz, bidaiariek behera egin dute

Iazko urteko uztailarekin alderatuz gero, %8,5 handitu da bidaiarien kopurua Bilboko aireportuan. Zehatzago esanda, aurtengo uztailean 603.139 pasaiari igaro dira bertatik. Urte osoan aireportuak daraman bilakaerari jarraipena ematen dio datu horrek, urteko lehen zazpi hilabeteak 2018. urtekoekin alderatuz gero, %9 hazi baita bisitarien kopurua.

Aipatu dugunez Bilbokoa ez da bisitari gehiago jaso izan dituen aireportu bakarra. Uztailean 32.933 bidaiarik erabili zuten Hondarribiko aireportua, pasa den urtean baino %14,1 gehiagok. Forondatik, berriz, 17.565 pasaiari igaro ziren pasa den hilean, iazko uztailean baino %51 bidaiari gehiago. Nafarroako aireportuan, Noainen, 25.047 pertsona erregistratu ziren, pasa den urtearekin alderatuz gero, %16.3 handitu da bisitarien kopurua.

Arabako aireportuak jasandako bisitarien gorakada ikaragarria, gehienbat 24 orduz zabalik egotearen ondorioa da. Aireportu honen erronka nagusia etorkizunean bilakaera positibo hori mantentzea da. Edonola ere, zail xamar izango du. Izan ere, Forondako bisitari kopuruak behera egin dezake Ryanair hegazkin konpainia irlandarrak Gasteiz Tenerife Hegoaldearekin lotzen duen hegaldia bertan behera uzten badu.

Miarritzeko aireportuan bisitari kopuruak ordea behera egin du. Miarritzeko (Lapurdi) bidaiarien kopurua %2 jaitsi egin da aurtengo uztailean, hau da, 2.500 pasaiari gutxiago. Lehen zazpi hilabeteak kontuan izanez gero nabarmena da beherakada. Aurreko urtean baino 60.000 bidaiari gutxiago pasa dira bertatik.