https://static.elcorreo.com/www/menu/img/zurekin-desktop.jpg

Lindano arrastoak aurkitu dituzte Jata eta Enekuriko basoetan

Lindano arrastoak aurkitu dituzte Jata eta Enekuriko basoetan

Eusko Legebiltzarrak lindanoaren inguruko lege bat onesteko proposamena aho batez onartu zuen pasa den martxoaren 27an

UNAI SARRIUGARTE

Lindano arrastoak aurkitu dituzte Jata eta Enekuriko basoetan. Ekologistak Martxan plataformak aspaldidanik salatua zuen Bizkaiko zenbait zabortegietan lindano deituriko hondakin toxikoaren arrastoak zeudela. Honen ondorioz, baso hauek su hartzeko arriskua aurkezten dute.

Elkarte honek baso hauetako zuhaitzen zur laginak hartu zituen eta arrastook laborategi batek aztertu ditu. Arrasto hauen emaitzak baso bi hauetan lindanoa dagoela baieztatu dute. Enekuriko zonaldean 1,81 miligramo eta 3,64 miligramo zur kilogramo bakoitzeko. Jata mendiko esparruan, berriz, 3,14 eta 6,47 miligramo.

Ekologistak Martxan plataformako Javier Vazquezek nabarmendu duenez euskal zuhaitzetan lindano arrastoak egotea bi arrisku ekar ditzake: batetik, basoak su hartuko balu, lindanoa desegingo litzateke, eta fosgeno izeneko substantzia pozoitsua askatuko luke; bestetik, lindanoa aurkezten duten zuhaitzen zura papera eta altzariak ekoizteko erabili ohi dute. Hori arriskutsua izan daiteke zuhaitz hauek ez badira tratatzen.

Eusko Legebiltzarrak lindanoaren inguruko lege bat onesteko proposamena aho batez onartu zuen pasa den martxoaren 27an. Bertan hartutako erabaki ezberdinen artean, arazo honi aurre egiteko lan mahai bat sortzea aurreikusi zuten. Orain, berriz, mahai hori abian jartzeko eta horretan gizarte eragileei tokia egiteko eskatu dute.

Ekologistak Martxan taldea pertsona ezberdinez osaturiko elkarte bat da, Euskal Herriko ingurumen arazoez ikuspegi berdintsu bat elkarbanatzen duena. Plataformak ekologismo sozialarekin bat egiten du. Izan ere, ingurumen arazoek produkzio eta kontsumo eran dute oinarri.

Elkarteak sentsibilizazio kanpaina ezberdinak jorratzen ditu, baita ingurumena kaltetzen duten egoeren salaketa publiko edo legalak, horren aurrean irtenbide egoki eta jasangarriak proposatuz.