https://static.elcorreo.com/www/menu/img/zurekin-desktop.jpg

Leioako Umore Azokak 49 konpainia eta 19 estreinaldi eskainiko ditu

Leioako Umore Azokak 49 konpainia eta 19 estreinaldi eskainiko ditu
P. Urresti

Jardunaldiak maiatzaren 16tik 19ra bitartean ospatuko dira

UNAI SARRIUGARTE

49 konpainia eta 19 estreinaldi ikusteko aukera egongo da maiatzaren 16tik 19ra bitartean Leioan ospatuko den Umore Azokan. Aurtengo edizioan obren kalitatea, originaltasuna eta ugaritasuna azpimarratu daiteke. Izan ere, batzorde artistikoak 620 proposamenen artean aukeratu dituzte parte-hartzaileak.

Umore jardunaldietan parte hartuko duten 49 konpainietatik: Euskadiko 19 konpainia, Espainiar estatuko beste 19, atzerriko 8 eta Leioako udalerriko 3 talde egongo dira ikusgai. Leioako Umore Azoka Bizkaiko Foru Aldundiak, Leioako Udalak, Eusko Jaurlaritzako Kultura Sailak eta Instituto Nacional de las Artes Escénicas y la Música-k (INAEM) sinatutako lankidetza hitzarmenaren ondorioa da.

Halaber, kaleko arte eszenikoen alorrean Euskadiko garrantzitsuena den lehiaketaren barruan, «Tokiko Eszena» ekimena burutuko da. Ekimen hau bultzatuko den hirugarren urtea izango da, aurreko urteetan lortutako emaitza bikainak direla bide. Bertan, Leioako hiru adierazpen artistikoek hartuko dute parte. Leioako Udalak helarazi duenez herriko talentuaren aldeko apustua oso garrantzitsua da.

Guztira, 120 emanaldi baino gehiago ikusi ahal izango dituzte bisitariek. Antzerkia eta zirku garaikidea izango dira programazioaren ardatza. Era berean, publiko guztietara zuzendutako genero anitz ikusteko aukera egongo da: musika, magia, clownak, dantza bertikalak eta airekoak, txotxongiloak, harearekin egindako artea, musika-tresnak egiteko tailerra etab.

Aipatu dugunez, 19 euskal konpainia eta Estatutik etorritako beste 19 konpainia ikusi ahal izango dira: Kataluniatik sei, Andaluziatik hiru, Madrildik hiru, Murtziatik bi, Galiziatik bi eta Valentziako Komunitatetik, Gaztela Mantxatik eta Gaztela Leonetik bana. Nazioarteari dagokionez; Frantziatik lau, Italiako bi eta Belgikako konpainia bat etorriko da.