Lauaxeta omenduko duen eskultura proiektua hautatu dute Laukizen

Laukizko Udalak Esteban Urkiaga Basaraz 'Lauaxeta' omentzeko eskultura-lehiaketaren irabazlea iragarri du, haren jaiotzaren 120. urteurrenean. Aurreko ostiralean eginiko ebaluazioaren ondoren, hautatutako proposamena 'Harroa eta Sendoa' izan da, Ane De la Sota, Noelia López eta Wen Can Lorenzok sortua. Euskal literaturan utzitako ondarea omentzeko, Lauaxeta plazan kokatuko da eskultura.

'Harroa eta Sendoa' proiektu irabazlea Lauaxetaren biografiaren eta lan batzuen inguruko ikerketa baten ondorioz sortutako 2 metroko pieza bat da. Artistaren poemetan agertzen diren naturako elementu guztiak irudikatzen dituen eskultura abstraktuak, hormigoizko bi elementu geometriko ditu, burdinazko elementu batez lotuak daudenak. Pieza honen hormetan, Lauaxetak idatzitako pasarte bat grabatuta ageri da, ikusleak obraren inguruan mugitzen diren heinean irakurri ahal izateko.

Azkenik, eskulturaren erdian dagoen hutsuneak Gerra Zibileko garai latz eta hutsala gogorarazten du, Lauaxetak berak lehen pertsonan bizi izan zuena. Izan ere, euskal kulturaren defentsan egindako lanagatik fusilatua izan zen. Beraz, obra indar handikoa da, historiaz betea eta Lauaxetari erabat eskainia.

Diziplina anitzeko hautaketa-prozesua

Proiektu irabazlearen erabakia hartu duen epaimahaia hainbat adituk osatu dute: Laukizko tokiko artistak, UPV/EHUko Arte Ederren Fakultateko eskultore entzutetsuak eta Laukizko udal taldeko ordezkariak. Horrez gain, poeta zenaren senide zuzenenek ere parte hartu dute hautaketa-prozesuan. Irizpide nagusiak «sormena, bideragarritasun teknikoa, sinbolismoa eta ingurunera egokitzapena izan dira», esan dute.

Udaleyik gogorarazi dutenaren arabera, «inaugurazioan Lauaxetaren gertuko senideek parte hartu, ekimena eskertu eta poetaren oroimena bere jaioterrian bizirik mantentzea ezinbestekoa dela azpimarratu zuten. Haien presentziak ekitaldiari kutsu hunkigarria eman zion, obra, komunitatea eta omendutako pertsonaren ondarea lotuz».

Halaber, nabarmendu dute eskultura Lauaxeta Plazan instalatuko dela datozen hilabeteetan, poetaren jaiotzaren 120. urteurrena ospatzeko Laukizko Udalak antolatu dituen ekimenen baitan.

Halaber, interesdunek jakin behar dute martxoaren 7ra arte, irabazle izan den proiektua eta aurkeztutako gainerako proposamenak ikusgai egongo dira Probalekuan 10.00etatik 13.00etara eta 18.00etatik 20.00etara.

• Temas
• Euskera