https://static.elcorreo.com/www/menu/img/zurekin-desktop.jpg

Lasala konpainiaren 'Argia' izeneko dantza-ikuskizuna izango da bihar, Gasteizen

'Argia' dantza-ikuskizunaren irudi bat./vitoria-gasteiz.org
'Argia' dantza-ikuskizunaren irudi bat. / vitoria-gasteiz.org

Judith Argomanizek sortutako konpainia Felix Petite Antzokian arituko da

PAUL PICADO

'Argia' izeneko dantza-ikuskizuna izango da bihar larunbatean Gasteizko Felix Petite Antzokian. Judith Argomanizek sortutako Lasala konpainiak prestatu du saioa, eta 20:30ean hasiko da. Emanaldi honetan, alde batetik, gauza sakratuak, garbitasuna, leuntasuna eta hauskortasuna lantzen dira, eta bestetik, gordintasuna eta basatasuna. Gutxi gorabehera 45 minutuko ikuskizuna da, eta lau dantzari arituko dira: Carla Diego, Garazi Etxaburu, Jaiotz Osa eta Paula Parra. Sarrerak internet bidez eros daitezke, eta prezioa 7,50 (30 urtetik beherakoak) eta 15,00 (sarrera orokorra) euro artekoa izango da.

Judith Argomanizek dantza klasikoa ikasi zuen Donostian, eta 2005. urtean Ballet Biarritz Junior konpainian sartu zen. Konpainia horrekin, Thierry Malandainen lanak antzeztu zituen. Geroago, Bartzelonara joan zen dantza garaikidea ikastera, eta ikasketak osatzeko, 2009. urtean Madrilerako bidea hartu zuen, Virginia Valerok zuzendutako María de Ávila Goi-mailako Dantza Kontserbatorioan ikasteko. Han, notarik onena atera zuen ikasketa amaierako proiektuan. Garai horretan, besteak beste, Nacho Duato, La Macana, Iker Arrue eta Laura Vilarren lanak antzeztu zituen.

2012. urtean Amaury Dance konpainian sartu zen eta handik urtebetera bere konpainia sortu zuen, Lasala izenekoa. Berez, dantza eta argazkilaritzatik etorritako artistek sortu zuten, eta helburua hizkuntza fisikoa eta gaur egungo estetika bilatzea da.

Estatuko eta nazioarteko hainbat jaialditan parte hartzeko deitu dute, eta 'Hooked' izeneko lehen lanarekin zenbait sari irabazi zituen, hala nola, lehen saria eta publikoaren saria, Frantziako lehiaketa batean; lehen saria, Alcobendaseko IX. Dantza eta Arte Eszenikoen Nazioarteko Lehiaketan; bigarren saria, Madrilgo Gazte Sortzaileen III. Dantza Lehiaketan; bigarren saria ere bai Sabadelleko VIII. Koreografia Lehiaketan, eta azkenik, aipamen berezia Huescako Nazioarteko Antzerki eta Dantza Azokan.