https://static.elcorreo.com/www/menu/img/zurekin-desktop.jpg

Kukai dantza konpainiak irekiko du Internationale Tanzmesse dantza-azoka

Kukai dantza taldea./E. C.
Kukai dantza taldea. / E. C.

Alemaniako Düsseldorf hirian egiten duten nazioarteko dantza-azokak euskal ordezkaritza izango du 'Basque Dance' delako stand-arekin

AMALIA IBARGUTXI

Dantza garaikidearen erakusleiho garrantzitsuenetarikoa da Internationale Tanzmesse nazioarteko dantza-azoka, Alemaniako Düsseldorf hirian egiten dutena. Aurten, abuztuaren 29tik irailaren lehenera burutuko dute, eta izango du euskal ordezkaritzarik ere, 'Basque Dance' delako stand-arekin, «esperientziak partekatu, lan-harremanak eraiki eta euren lanak erakusteko», Etxepare Euskal Institutua eta ADDEren (Euskal Herriko Dantza Profesionalen Elkartea) elkarlanari esker.

Gainera, Kukai Dantza Konpainiak inaugurazio ekitaldian hartuko du parte. Han aurkeztuko dute, hain zuzen, 'Oskara' ikuskizuna abuztuaren 29an. Ez da, ordea, programazioaren baitan izango den euskal ordezkaritza bakarra. Programazio ofizialak bereizten dituen atalen baitan, 'Open Studio' delakoa aurkitzen da, non konpainiek oraindik sortze prozesuan dauden proiektuak erakusten dituzten. Horien artean, Jone San Matin eta Mikel R. Nietok Emanuele Soavi koreografoarekin egiten ari diren lana aurkeztuko dute.

Basque Dance postuan, bestalde, ADDEk sortutako euskal konpainien katalogoa eskuratu ahal izango dute mundu osotik azokara bertaratuko diren profesionalek. Era berean, hainbat euskal konpainia bertan izango dira euren lanak erakusten eta lan-harremanak sortzen zein sendotzen.

Guztira, sei izango dira stand-ean topatu ahalko diren dantza konpainiak. Dantzaz Konpainia, La Glo Zirku Dantza, Organik, Lokke, Igor and Moreno eta Kukai Dantza Konpainia, hain zuzen. ADDE eta Etxepare Institutuko ordezkariak ere izango dira bertan konpainien lana babesten.

Konpainiek eta dantzariek zuzenean aurkeztuko dituzte ikuskizunak, baina Tanzmessek bestelako ekintzak ere programatzen ditu, hala nola aurkezpenak, hitzaldiak lantegiak edota bilerak.

Temas

Euskera

Contenido Patrocinado

Fotos

Vídeos