https://static.elcorreo.com/www/menu/img/zurekin-desktop.jpg

'Koskak' euskarazko antzezlana izango da gaur, Principal Antzokian

Ikuskizuna, berez, hiru antzezlan dira, eta bakoitzean umore desberdina lantzen da

PAUL PICADO

'Koskak' izeneko euskarazko antzezlana izango da gaur asteazkenean, Gasteizko Principal Antzokian. Ikuskizuna, berez, hiru antzezlan dira, hots, hiru obra desberdin. Gauzak horrela, antzezlan bakoitzean lantzen den umorea ere desberdina dela nabarmendu dute antolatzaileek. Obra horiek dagoeneko gaztelaniaz antzeztu badira ere, lehen aldia izango da euskaraz egiten direla.

Pez Limbo konpainiak sortutako lana da 'Koskak', eta antzezleak Raúl Camino, Begoña Martín, Silvia Martín eta Edu Hernando dira. Ikuskizuna 20:00etan hasiko da, eta gutxi gorabehera ordubeteko iraupena izango du. Sarrerak erosi nahi izanez gero, hemen egin daiteke, 15 euroan.

Esan bezala, hiru antzezlan desberdin dira: lehenengoaren izenburua 'Bizkarrezurra edo tripakiak?' da, eta umore traidorezko pieza bat da. Estu dabilen emakume bat agertzen da bertan, eta bere konfiantzazkoa izan zen harakinarengana jotzen du arrunta ez den zerbait eskatzeko.

Bigarrenaren izenburua, 'Ama oiloa' da, eta umore deserosoa dela esan daiteke. Kontsulta mediko berezia da, izan ere, han lan egiten duen medikuak ez da eroso sentitzen kontsulta dagoen tokian. Haurdun dagoen emakume bat mediku harengana joaten da eta istorioa horri buruzkoa izango da.

Hirugarrenaren izenburua 'Boxerrak' da, eta txakurren umorea delakoa lantzen da. Kasu honetan bi gizabanako agertzen dira, kontu klandestino batean nahastuta daudenak. Dirua erraz irabaz dezakete, baina kontrakoa ere gerta daiteke. Baliabide gutxi dituzte, hala nola txakur mamu bat eta gezurrezko izenak, baina eskura duten guztia egingo dute dena ondo ateratzeko.

Temas

Euskera