Komedialdia umore jaialdia hilabete bat barru hasiko da Gasteizen

Gutxi falta da Komedialdia Gasteizko Umore Jaialdia hasteko. Maiatzaren 24tik 29ra bitarte ospatuko da euskara, gaztelania eta hitzik gabeko ikuskizunak uztartuko dituen ekitaldi hau. Zehazki, Jose Kruz Gurrutxagak estreinatuko du euskarazko antzezlana maiatzaren 25ean Vital kulturgunean. «Inoiz baino positiboago, biziago eta kolorez beterik bueltatuko gara eta 'Hemen eta orain' mezua zabalduko dugu», adierazi dute antolatzaileek.

Esan dutenez, Gasteizko jaialdian Óscar Terol, Susana Soleto edota aipatutako Jose Kruz Gurrutxaga bezalako izen bereziak izango dira haien obra berriak estreinatzeko. Baina, zer aurkituko dugu aurten Komedialdia-n?

-Umorez serio hitz egiteko jardunaldiak. Umorea gure gizarteko tresna bat dela ulertzeko gogoetak eta hitzaldiak. Maiatzaren 24, 25 eta 26ko goizeetan, Gasteizko Europa Biltzar Jauregian.

-Umoreguneak. Ikuskizunak eta jarduera integratzaileak batuko dituzten umore-espazioak. Gasteizko Udalaren Sareko antzokietan eta Vital Kulturunea bezalako espazio pribatuetan.

-Elkartasungunea. Edizio honetan ekintza solidarioak Arabako Alboko esklerosi amiotrofikoaren Elkartearen (ADELA-ren) alde egingo dira, aurten 25 urte bete dituelako. Lakua 03 pilotalekuan (duela hilabete batzuk hiriburuko txertodromoa izan zena) 'barre-dromo' bihurtuko da maiatzaren 29an.

-Umorekalean. Aurten lehen aldiz egingo den atala. Komertzio txikietan, establezimenduetan eta kalean egingo diren espazioak dira. Gainera, 'Irritxo-pote' berezi bat antolatu da Judimendiko auzoan denok elkartu gaitezen.

Jarduera batzuk ordaindu beharko dira eta sarrerak datorren maiatzaren 5etik aurrera egongo dira salgai webgunean, behin programazioa ixten denean. Dena den, jarduera gehienak dohakoak izango dira jaialdiko babesle eta kolaboratzaile publiko eta pribatuei esker.

• Temas
• Euskera
• Vitoria-Gasteiz