https://static.elcorreo.com/www/menu/img/zurekin-desktop.jpg

'Hil kanpaiak' filmaren grabaketa lanak laster hasiko dira

Itziar Ituño. /
Itziar Ituño.

Eneko Sagardoy eta Itziar Ituño izango dira luzemetraiaren aktore protagonistak

UNAI SARRIUGARTE

'Hil kanpaiak' luzemetraiaren grabaketa lanak hil honetan hasiko dira. Nafarroan izango da filmaketa eta hauxe Imanol Rayo nafar zinemagilearen bigarren film luzea izango da. Bertan Eneko Sagardoy eta Itziar Ituño izango dira aktore protagonistak.

'33 ezkil' izeneko Miren Gorrotxategi azpeitiar idazlearen lehen eleberria zinemara eramango dute. Gorrotxategiren liburuan oinarritutako filma euskara hutsean grabatuko dute. Rayoren lehendabiziko filma ere 'Bi anai' izeneko Bernardo Atxaga euskal idazlearen egokitzapena izan zen.

Eneko Sagardoy eta Itziar Ituño aktoreez gain, Josean Bengoetxea, Itsaso Arana, Yon Gonzalez, Asier Hernandez eta Iñigo Aranburu aktoreek hartu dute esku filmean.

Alba Produkzioak ekoiztetxeak egindako thriller honek, drama familiar bat izango du hizpide eta baserrian lurperatua topatuko duten burezur batek hautsak harrotuko ditu. Hortik eta aste batzuetara, ordea, familia honetako aita den Ferminek aurkikuntza misteriotsu hori aurkitu eta ondoren hilik topatuko dute.

Imanol Rayo Iruñean jaiotako zinemagilea da. Andoaineko Zinema Eskolan Zine Zuzendaritza ikasitakoa da. Ondoren, Zinema idazkuntza ikasi zuen Urnietako Michel Gaztambide eskolan.

Bestalde, Itziar Ituño basauritarrak Interpretazioa ikasi zuen Basauriko Antzerki Eskolan, eta soziologia ikasketak ere gauzatu zituen. Ituño lan ugari jorratutakoa da antzerkian, telebistan, nahiz zineman. Ezagun egin zen ETB 1eko 'Goenkale' telesailean egindako paperagatik. Era berean, 'Lasa eta Zabala', 'Errementari' eta 'Loreak' filmetan esku hartu du. Halaber, egun 'La casa de papel' telesailean (Antena 3 katean aurrena, ondoren Netflix plataforman) egindako lanak nazioartean ezagutarazi du.

Eneko Sagardoy aktore durangarrak, berriz, Ikus-entzunezko komunikazioa ikasi zuen Mondragon Unibertsitatean. Telebistan, antzerkian eta zineman ibilitakoa da. 'Handia' filmaren protagonista izan zen, Migel Joakin Eleizegi antzeztuz, eta Goya sari bat eskuratu zuen paper horrengatik. Beste zenbait filmetan ere esku hartu izan du, 'Errementari' esaterako.