https://static.elcorreo.com/www/menu/img/zurekin-desktop.jpg

Joxean Tolosa pilotari ohiak agur esango die pilotalekuei irailean

Joxean Tolosa (ezkerrean) eta Xabier Euzkitze pilota saio batean./EiTB
Joxean Tolosa (ezkerrean) eta Xabier Euzkitze pilota saio batean. / EiTB

Logroñoko San Mateo torneoan emango dio amaiera 23 urteko EITBko pilota esatari lanari

UNAI SARRIUGARTE

Joxean Tolosa pilotari ohiak agur esango die pilotalekuei irailean. Logroñoko San Mateo torneoan emango dio amaiera 23 urteko EITBko pilota esatari lanari. Pilotari eta komunikatzaile gipuzkoarrak bere ibilbidean 6.000 pilota ikuskizun ingururen berri eman du.

Urritik aurrera Xabier Euzkitzek beste bikotekide bat izango du EITB1eko esku pilotako ikuskizunetan. EiTBk datorren denboraldirako aldaketak egingo ditu eta amezketakoaren hutsunea beste pertsona batek bete egingo du. Tolosak irailaren 29an egingo ditu azkeneko esatari lanak, Logroñoko San Mateo torneoko finalean.

EITBk duela hilabete batzuk jakinarazi zion Tolosari esku pilotako emanaldietan aldaketak egiteko asmoa zuela. Era berean, El Diario Vasco egunkariak argitaratu zuen hilaren amaieran egingo duten bilera batean iritsiko direla behin betiko erabakiaren nondik-norakoak.

64 urte beteko ditu aurten Amezketako pilotari ohiak. Banakako txapelketa bat eta binakako hiru irabazi izan zituen pilotari profesional gisa Tolosak: banakakoa 1989an Retegi II.ren aurka eta binakakoak, berriz, 1982an, 1987an eta 1989an. Esatari lana EITBn pilota utzi eta urte batzuetara hasi zuen, 1996an, hain zuzen ere. Aipatu dugunez 6.000 partida baino gehiagoren berri eman izan du 23 urte luzeren buruan.

Larunbat arratsaldeetako jaialdietan, bestetik, Josetxo Lizartza aritzen da esatari, Jokin Errasti pilotari ohiarekin batera. Era berean, aurtengo denboraldiko pilota txapelketa nagusien finaletan, EITBk formatu berri bat erantsi egin die pilota emanaldiei. Pedro Mari Goikoetxea kazetariak mintzaldietarako esparru berri bat gidatu izan du. Tarte horietan, Abel Barriola, Mikel Idoate eta Juan Mari Juaristi Atano XIII.a aritu izan dira finalen osteko analisia burutzen.

EITBk pilotalekuetako ahots beterano bat baino gehiago isilarazi izan du azken hilabeteotan. Izan ere, Joxean Tolosaz gaindi, Euskadi Irratian pilotalekuetako esatari lanak burutzen zituen Iñaki Elorza berri emaile beteranoak sanferminetan erretiroa hartu izan zuen. Elorza Euskadi Irratiaren hasieratik dihardu zuen pilota esatari gisa.