https://static.elcorreo.com/www/menu/img/zurekin-desktop.jpg

Joanes Illarregi eta Josu Sanjurjok itxi dute Nafarroako finalaurrekora sailkatutako lagunen zerrenda

Joanes Illarregi./Bertsoa.eus
Joanes Illarregi. / Bertsoa.eus

Martxoaren 3an hasita, Nafarroako Bertsolari Txapelketako hiru finalaurreko jokatuko dira, eta horietako bakoitzeko irabazlea finalera sailkatuko da zuzenean

AMALIA IBARGUTXI

Asteburuan Iruritan jokatu da Nafarroako Bertsolari Txapelketako hirugarren final-laurdena. Joanes Illarregik eskuratu du puntu gehien (264,5), eta hortaz, martxoaren 10ean Lesakan jokatuko den finalaurrekorako txartela eskuratu du. Haren atzetik sailkatu dira Xabier Terreros (257), Xabat Illarregi (250,5), Xabi Maia (247), Endika Legarra (233) eta Patxi Castillo (230). Bost bertsolari hauek, igandeko final-laurdenera itxaron behar izan dute, eta Lizarran jokatutako azken final-laurdenean Josu Sanjurjo nagusitu eta gero, osatu da txapelketako finalaurrekoetan ariko diren 18 bertsolarien zerrenda.

130 bertsozale inguru bildu dira Lizarrako Gazteriaren Etxean, Eneko Lazkoz, Julen Zelaieta, Josu Sanjurjo, Amaia Elizagoien, Sarai Robles eta Diego Riañoren azken final-laurdena zuzenean jarraitzeko. Ander Aranburuk egin ditu gai-jartzaile lanak. Epaile, berriz, Arkaitz Goikoetxea, Amaia Telletxea eta Joseba Beltza aritu dira.

Saio puntuagarriaren ostean, Josu Sanjurjok eskuratu du puntu gehien (263), eta hortaz, martxoaren 10ean Lesakan jokatuko den finalaurrekorako txartela eskuratu du. Haren atzetik sailkatu dira Eneko Lazkoz (256,5), Sarai Robles (255), Julen Zelaieta (250,5), Diego Riaño (248) eta Amaia Elizagoien (236,5).

Final-laurden bakoitzeko irabazleari, sailkapenaren araberako hurrengo hamahiru bertsolariak gehitu zaizkio. Martxoaren 3an hasita, hiru finalaurreko jokatuko dira, eta horietako bakoitzeko irabazlea finalera sailkatuko da zuzenean. Sailkapenaren araberako bost bertsolari ere pasako dira martxoaren 23an Iruñeko Anaitasuna kiroldegian jokatuko den finalera.

Martxoaren 3an, Atarrabiako Kultur Etxean egingo dute lehena Saats Karasatorre Martinez, Eneko Lazkoz Martinez, Sarai Robles Vitas, Aimar Karrika Iribarren, Xabi Maia Etxeberria eta Joana Ziganda Olano; gero, hilaren 9an, Etxarri Aranatzekoan izango dira Julio Soto Ezkurdia, Xabier Terreros Gartzia, Julen Zelaieta Iriarte, Diego Riaño Barroso, Iker Gorosterrazu Elizagoien eta Iban Garro Alzuri; martxoaren 10ean, azkenik, Lesakako Kultur Etxean ariko dira Joanes Illarregi Marzol, Josu Sanjurjo Altzuri, Xabat Illarregi Marzol, Alazne Untxalo Erregerena, Saioa Alkaiza Guallar eta Eneko Fernandez Maritxalar.

Temas

Euskera