https://static.elcorreo.com/www/menu/img/zurekin-desktop.jpg

'Janis: Little girl blue' filma izango da gaur Oihaneder Euskararen Etxean

'Janis: Little girl blue' filma izango da gaur Oihaneder Euskararen Etxean

Filma euskarazko azpituludun zinema sustatzeko Filmazpit programaren barruan izango da, 19:30ean

PAUL PICADO

'Janis: Little girl blue' izeneko filma emango dute, gaur, Oihaneder Euskararen Etxean (Gasteizko Kafe Antzokia). Filma 19:30ean hasiko da, eta Zineuskadik, euskal ikus-entzunezko sektorea bultzatzen duen elkarteak, finantzatutako Filmazpit programaren barruan emango dute. Programa horrek hain zuzen ere euskarazko azpitituludun zinema sustatzen du, eta beraz, filma jatorrizko bertsioan egongo da, euskarazko azpituluekin.

Filmazpit programaren bidez batik bat Euskadin antolatzen diren filmak hautatu, emateko eskubideak eskuratu eta euskarazko azpitituluak jartzen dira. Helburua da filma horiek nahi duen edozein kultura-eragileren eskura jartzea, horrek kosturik ekarri gabe. Azken finean, emanaldiak antolatzea da helburua, baina irabazi-asmorik gabe.

Oraingoan Amy Bergek zuzendutako «Janis: Little girl blue» filma izango da ikusgai Kafe Antzokian. Estatu Batuetako filma da, 2015. urtekoa, eta jatorrizko hizkuntza ingelesa da. Janis Joplin abeslariaren inguruko dokumentala da, 106 minutukoa. Janis Joplin, berez, handinahia eta errebeldea zen, eta bere herritik joan zen dirudun bihurtzeko helburuarekin.

Dokumentalean artistaren anaia txikiak, hainbat maitale eta bera abeslari nagusia zen Big Brother & The Holding Company taldeko kideak elkarrizketatzen dira, Janisen bizitzari buruz hitz egiteko. Inoiz argitaratu ez diren dokumentuak erakusteaz gain, Janisen abesti asko ere entzuten dira. Omenaldia egiten zaio nolabait, rockaren arloan oihartzun handia izan zuelako. Big Brother & The Holding Company taldearekin 1968. urtean kaleratutako Cheap Thrills lana, hain zuzen, San Frantziskoko soinu psikodelikoaren maisulantzat hartu zuten.

Temas

Euskera