https://static.elcorreo.com/www/menu/img/zurekin-desktop.jpg

Jakartak Indonesiako hiriburu izateari utzi egingo dio

Jakartak Indonesiako hiriburu izateari utzi egingo dio

Borneo uharteko Kalimantan ekialdeko probintziako leku zehatz bat aukeratu du gobernuak hiriburu berria eraikitzeko

UNAI SARRIUGARTE

Jakartak Indonesiako hiriburu izateari utzi egingo dio. Izan ere, halaxe iragarri du Indonesiako presidente den Joko Widodok. Hiri hau itsasoko uraren mailaren mehatxupean dago eta itsasoak hiri hau irentsi dezakeenez, neurri hau hartzea erabaki du Gobernuak. Egun Jakartak hamar milioi biztanle inguru ditu. Edonola ere, bertako metropolian 30 milioi biztanle inguru bizi dira.

Indonesiako agintariek dagoeneko erabakita dute hiriburu berria non eraikiko duten. Borneo uharteko Kalimantan ekialdeko probintziako leku zehatz bat aukeratu dute. Hauxe oso puntu estrategikoa da uraren mailaren igoerari aurre egiteko, Indonesiaren erdialdean kokatuta baitago.

Herrialde hau 17.000 uhartez osatuta dago eta 5.120 kilometroko dimentsioa aurkezten du ekialdetik mendebaldera eta 1.760 kilometroko zabalera iparraldetik hegoaldera. Hortaz, bertako hiriburu berria eremu handi horren erdigunean eraikiko dute.

Gobernuak erabaki honen bitartez herrialdeak jasan ahal dituen hondamendi naturalei aurre egitea bilatuko du. Widodo presidenteak iragarri duenez toki horretan uholdeak, lurrikarak, tsunamiak eta sumendi erupzioak izateko arriskua askoz txikiagoa da. Izan ere, Jakarta Ozeano Bareko Suzko Eraztunean kokatuta dago, lurrikara eta sumendi erupzio asko izaten dituen eremuan alegia.

Balikpapan eta Samarinda hirien artean dago agintariek proposatu duten lekua. Baso tropikala da nagusi bertan eta bertako bioaniztasuna aipatzekoa da. Oraindik herrialde honetako hiriburu berriak izango duen izena iragarri behar dute.

Bambang Brodjonegoro Gobernuko Planifikazio ministroak gaineratu duenez erakunde eta agentziak 2024. urtetik aurrera hasiko dira Jakartatik bertara salto egiten.

Egun Jakartako biztanle asko kezkatua dago gai honen inguruan. Izan ere, hiria behera egiten ari da, itsasoko uraren mailak gora egiten duen bitartean. Hainbat ingurumen adituk diotenez gaur egungo erritmoari eutsiz gero, hiriaren heren bat suntsitu egingo da 2050. urterako, itsasoak bereganatuta.

Temas

Euskera