https://static.elcorreo.com/www/menu/img/zurekin-desktop.jpg

Izena eman

Homofobiaren kontra, lasaitasunez, izena eman beharko genuke./
Homofobiaren kontra, lasaitasunez, izena eman beharko genuke.
Txani Rodríguez
TXANI RODRÍGUEZ

Nahiko ondo gogoratzen ditut nire DBHko garaiak. Orokorrean, positiboak dira nire oroitzapenak. B ereduan ikasi zuen lehenengo belaunaldiaren parte izan nintzen, eta berotasun berezi baten bulkada sentitzen genuen geure inguruan. Gainera, ikasle ona nintzen eta urte horiek ez ziren gogorrak izan niretzat. Hala eta guztiz ere, ikasgai-zerrenda derrigorrezkoa zen: testu-komentarioak, ekuazioak, gramatika ingelesa…

Ikasgaietatik at beste zenbait gauza irakatsi zizkiguten: alde batetik, eta esaterako, andereño batek idaztera animatu ninduen sari bat irabazi nuenean. Mural bat egin zuen egunkarietako zatiekin eta nork bere buruan konfiantza izan behar duela azaldu zidan. Egia esan, maisuek eta andereñoek ikasle bakoitzak zituen potentzialak indartu zituzten. Guztiok dugu zer edo zer.

Beste alde batetik, zenbait joera sustatu zituzten. Adibidez, fluorrekin egiten genituen ikuzketak hortz-higienea zaintzeko. Aho-osasuna garrantzitsua zela esaten ziguten. Modu berean, kirolaren bat praktikatzera animatu gintuzten, eta Taekwondo-ra apuntatu nintzen. Egun, Andaluzian behintzat, eta VOXen arabera, sustatzen dena homosexualitatea da. Niri, homosexualitatearen sustapenaren kontzeptua oso arraroa iruditzen zait. Ez dakit, egunen batean herriko dantza taldean parte hartzera eta hurrengoan homosexuala izatera animatzen dute orain?

Homosexualitatea ez da aktibitate bat, gazteek ez dute izena ematen homosexualak izateko, ez dut uste sexualitatea hautatzen denik. Errespetua da sustatzen ari dena eskolatan, baina nola azaldu hori aukera sexual guztiak errespetatzen ez dituenari. Gaia hain serioa izango ez balitz, barregarria izango litzateke. Zenbat haur izango dira egun heterosexualak homosexualitatea sustatu zen egunean klasera joan ez zirelako?, galdetu zidan Juan Carlos Márquez idazleak. Txantxetan zebilen, baina galdera horrek ondo erakusten du burugabekeria eta arinkeria baten aurrean gaudela. Gauza batzuk ez dira aukeratzen, ezta leloa izatea ere, agian. Hortaz, arnasa hartu behar dugu, eta homofobiaren kontra, lasaitasunez, izena eman. Joera horretarako, ikusten denez, badagoelako izen ematerik.

Temas

Euskera