Itsas Ondarearen Jaialdia, gaur, Mutrikun

'Itsas Ondarearen Jaialdia: Hiru Anai batela, mende bateko historia zuzenean' izeneko ekitaldia egingo da Mutrikuko portuan (Gipuzkoa), gaur, urriaren 10ean, Euskal Kostaldeko Geoparkearen 10. urteurrena ospatzeko.

Geoparkeko iturriek jakinarazi dutenez, 09.00etatik 14.00ak arte, Merkatu Txikiaren edizio berezia izango da, Mutrikuko ekoizleen baserriko produktuekin eta arrain kontserbekin, besteak beste, baserriko barazkiak, artzain gazta eta bertako produktuekin eginiko marmelada, eztia, txakolina, antxoak edo hegaluzea. Itsasoari loturiko artisautza leku bat ere izango da.

Halaber, 11.30etik aurrera, 'Hiru Anai' batela ikusteko aukera egongo da, Beduolako Elkarteko kideek ontziaren berreskuratze lanak zuzenean egiten dituzten bitartean. Gainera, orduko arotzek erabiltzen zituzten lanabes eta erreminten eta itsasoari lotutako materialaren erakusketa antolatu da.

Horrez gain, Arku Gain elkarteko kideek erakusgai jarriko dituzte herriko arrantza tresna zaharrak eta baxurako arrantzarako herrian erabili izan diren hainbat tresna, eta amuak nola egiten ziren erakutsiko diete herritarrei, herriko lanbide ohi bat berreskuratuz.

Arratsaldean, Beduolako batel tradizional batean portuan barrena nabigatzeko aukera emango zaie herritarrei. Interesa duen edonork egunean bertan erakusketan eman beharko du izena. Bestalde, Arrietakua jauregira bisita gidatuak egiteko aukera egongo da eta aurrez erreserba egitea beharrezkoa da geoparkea.eus webgunean.

Gipuzkoako Foru Aldundiko Kultura, Lankidetza, Gazteria eta Kirol Sailak bultzatzen duen 2020ko Ondarearen Europako Jardunaldien barruan antolatu da ekimena.