https://static.elcorreo.com/www/menu/img/zurekin-desktop.jpg

Iraganik ez

«Traktorea hartu, eta simaurra botatzera noa», dio Adrianek./Fotolia
«Traktorea hartu, eta simaurra botatzera noa», dio Adrianek. / Fotolia
Txani Rodríguez
TXANI RODRÍGUEZ

Aurreko astean, gazte asturiar batek egindako adierazpen batzuk zabaldu ziren sare sozialetan. Oso bideo arrakastatsua izan zen, eta gehiengoari erabat dibertigarria iruditu zitzaion. Hauxe da istorio honen historia: telebista saio batek, biztanleriaren zahartzeari buruz hitz egiteko, Asturiaseko jaiotze-tasarik baxuena duen herrixka batera jo zuen. Bertan, Yernes y Tameza udalbatzan, hamahiru urteko ume bat baino ez da bizi: Adrian. Kazetariek herri horretan pozik bizi zen ala ez galdetu ziotenean, honela erantzun zuen: «Estoy muy a gusto solo, no quiero que nadie me toque los cojones». Egia esan, emandako erantzun horrek ni goibeldu egin ninduen. Nola jolasten zen ere jakin nahi izan zuten kazetariek, eta ez zela jolasten argitu zuen Adrianek. «Klasetik atera ostean, lan egiten dut», zioen. «Traktorea hartu, eta simaurra botatzera noa». Ume hori gizon heldu bat balitz bezala mintzatzen zen; eta begi-bistan jartzen zuen bere begirada desafiatzailearekin haurtzaro barik gelditu den haur bat baino ez dela.

Autoritarismoa, abangoardia eta anarkia elkarrekin bizitzea baimentzen duen garai bakarra da haurtzaroa. Heldutasunari aurre egiteko oroipen zoriontsuak izan behar ditugu. Haurtzaroan bizi genituen une goxoak gotorleku sekretu bihurtzen ditugu maiz helduok. Haurtzarorik gabe hazi direnek itxura zakarra izan dezakete, Adrianek bezala, baina bere barruan jolasteko gogoak gora eta behera jarraituko du. Pena handia da herriak ume barik ikustea, eta haurtzaroa bizi ez duten haurren begiradek ondo asko zehazten dute porrot soziodemografiko horren sakontasuna. Aurrera begiratzean, herri horietan egiteko asko dagoela ondorioztatu genezakeen; baina atzera begiratzerakoan ikusiko dugu gehiegi sakrifikatu dugula aurrerakuntzaren izenean. Iraganeko oroimenak, heldutasunean aterpe eskaintzen diguten horiek, bere garaian heltzen ez den heldutasun horrek lapurtzen ditu. Etorkizun gutxiko herri bilakatu dira landa-eremuetan dauden herriak gazteentzako; baina haurren haurtzaroa bahitzen denean, iraganik ere ez dago. Iraganik ere ez.

Temas

Euskera