https://static.elcorreo.com/www/menu/img/zurekin-desktop.jpg

Huntza musika taldeak 'Buruz behera' abestiaren bideoklipa estreinatu berri du

Huntza musika taldeak 'Buruz behera' abestiaren bideoklipa estreinatu berri du

Kanta 2018. urtean kaleratutako 'Xilema' diskoaren barnean dago

UNAI SARRIUGARTE

Huntza musika taldeak 'Buruz behera' abestiaren bideoklipa estreinatu berri du. Bideoklipa apirilaren 16an eta maiatzaren 16an grabatu zuten Laidan eta Sopelan (Bizkaia). Grabaketa eta edizio lanak burutzeaz Harea Filmseko Aiora Ponce arduratu da. Era berean, produkzio lanetan Ioritz Ipiña, Eneko Pinilla eta Alex Erkoreka aritu dira.

Huntza 2014. urtean Bilboko kaleetan jaiotako musika taldea da. Banda unibertsitate giroan ezagututako sei gaztek osatzen dute eta beraien helburua, sortzen duten musika Euskal Herri osora zabaltzea da.

Ostegun iluntzeetako trikipoteoetan ezagutu zuten elkar eta noizean behin elkartzen hasi ziren ondo pasatzeko helburuarekin. Taldeari forma ematen joan ziren heinean, kantuak konposatzen hasi ziren, bakoitzak bere esperientziatik jasotakoa elkarbanatuz. Aipatu bezala, Bilbon sortutako taldea den arren, taldekide guztiak gipuzkoarrak dira.

Taldearen lehenengo agerpen publikoa 2016ko martxoaren 8an izan zen, 'Harro gaude' kantua kaleratuz. Bertan, oholtza gainera salto egin zuten lehen emakumeak omentzen dira. Hasiera apal honek ateak ireki zizkien jarraian etorriko ziren kontzertu eta agerraldiei.

2016ko azaroan Aldapan gora kanta argitaratu zuten eta abestiak arrakasta itzela bereganatu zuen. Abestia 2/4ko konpas sinple batean oinarritua izan arren, trikitixako konposizioetan izan ohi den bezala, pop-rock kutsu nabarmena du sartutako kontrapuntuak direla medio.

Urte horretako Durangoko Disko eta Liburu Azokarako «Ertzetatik» diskoa kaleratu zuten eta urte hartan Azokako salduenetakoen artean egon zen. Diskoa Usurbilgo Higain estudioan grabatu zuten Haritz Harreguyren gidaritzapean.

2017an, berriz, 'Lumak' izeneko bi abestitako EP-a atera zuten eta irabaziak Aspanogi, Gipuzkoako Haur Minbizidunen Guraso Elkartearentzat, joan ziren bideraturik.

Bestalde, 2018. urtean 'Xilema' izeneko disko plazaratu zuten. Disko hau EITBko Gaztea! irratiko DIDA saioan aurkeztua izan zen, eta bideoklipa telebistako kate nagusietan argitaratua izan zen.