https://static.elcorreo.com/www/menu/img/zurekin-desktop.jpg

Herritarren partaidetzaren alorreko berrikuntzari buruzko jardunaldia, Goiuri jauregian

Herritarren partaidetzaren alorreko berrikuntzari buruzko jardunaldia, Goiuri jauregian

Besteak beste, Bernardo Gutiérrez, Francisco Rojas, Emma Ortiz eta Jose Antonio Rodríguezek hitz egingo dute; ikastaroan Euskadi, Errioxa eta Nafarroako zenbait udalerritako teknikari eta politikoek eman dute izena

SERGIO EGUÍA

Herritarren Partaidetzaren Zerbitzuak gidatzen duen topaketa eta prestakuntza espazioak, Herritartasunerako Eskola Irekiak, herritarren partaidetzaren alorreko berrikuntzari buruzko jardunaldia antolatu du ostegunerako; Goiuri jauregian izango da, 10:00etatik 19:00etara.

Jardunaldia 'Joera eta esperientzia berritzaileak herritarren partaidetzaren alorrean' hitzaldiarekin hasiko da; Bernardo Gutiérrezek —kazetaria, ikerlaria, eta Madrilgo MediaLab-Prado herritar-berrikuntzarako laborategietako komunikazio arduraduna— herritarrek parte hartzeko mugimendu berriei buruz eta administraziorekiko beharrezko loturari buruz hitz egingo du.

12:00etan, herritar berrikuntzarekin lotutako zenbait esperientzia aurkeztuko dira, eta horiek garatu diren udalerrietan izandako oihartzuna azalduko da.

Jun (Granada) udalerriko alkate eta txiolari ezagun José Antonio Rodríguez Salasek 'Twitter, parte hartzeko eta gardentasunerako tresna gisa' izango du hizpide. Bartzelonako Udaleko Herritar Eskubideen, Kulturaren, Partaidetzaren eta Gardentasunaren Gerentziako Komunitate Jardueraren Zerbitzuko zuzendari Oscar Rebollok 'Auzoa partaidetzaren ardatz gisa' gaia jorratuko du.

A Coruñako Partaidetzaren eta Berrikuntza Demokratikaren zinegotzi Claudia Delso Carrerak 'Herritar laborategiak' izango du gaitzat, eta Gasteizko IGIko Mugikortasun Iraunkorrerako Planaren koordinatzailea den Juan Carlos Escuderok, azkenik, 'Gasteizko mugikortasun iraunkorreko ereduaren hitzarmena: ikasketa partekatuko ariketa' azalduko du.

Ikuspuntu esperimentalak

16:00etan, Novagob-eko zuzendariak 'Partaidetzan berritzeko ikuspegi esperimentala' izenburua duen hitzaldia emango du: hainbat administrazio publikok beren gobernu-laborategien bidez berrikuntza publikorako prozesuetan martxan jarri dituzten ikuspuntu esperimentalak azalduko ditu.

Amaitzeko, 17:0etan, 'Teoriatik praktikara. Berrikuntza publikorako ikuspegi esperimentala aplikatzen' lantegia egingo da, Emma Ortizen eskutik; Psikologiako lizentziadun horrek esperientzia handia du pertsonen prestakuntza eta garapen alorreko proiektuetan, eta lantegian udalerrietan erabil daitezkeen aukera eta ideia zehatzak identifikatzen saiatuko dira.

Ia 100 pertsonak (teknikariak eta politikariak) eman dute izena lantegian, hainbat erakundetakoak: Zarautz, Hernani, Loiu, Sestao, Iruñea, Donostia, Mungiako eta Bilboko udaletakoak, Gipuzkoako Aldundikoak, eta Errioxako udalerriren batekoak.

Contenido Patrocinado

Fotos

Vídeos