https://static.elcorreo.com/www/menu/img/zurekin-desktop.jpg

Henri Michaux eta Alberto Giacomettiren erakusketak izango dira Guggenheimen 2018an

Arte programazioari eskainitako diru kopurua aurten baino %5,7 gehiago izango da 2018an

ELCORREO.COM

Henri Michaux eta Alberto Giacometti artistei buruzko atzera begirakoak eta Thannahauser Bilduma eskainiko ditu Guggenheimak 2018ko arte programazioan baitan. Halaber, Marc Chagall, Esther Ferrer, Joana Vasconcelos, Michael Snow, Diana Thater eta Javier Tellez beste eskaintza batzuren protagonista izango dira.

Astelenean izandako bilera batean museoaren 20. urteurrena ospatzeko antolatutako ekimenen programaren berri eman zen. Programa 2017an zehar burutu da, eta «eragin eta ikusgarritasun» handia izan du, berton zein nazioartean. Ekitaldiko daturik nabarmenenak ere errepasatu dira. Horrela, azaroaren 30era arte, 1.238.428 bisitari izan ditu museoak, 2016an baino %14 gehiago, eta Banakako Kideak 27.370 izatera heldu dira, Lagunak, Jarraitzailek eta Erdu programako partaideak kontuan hartuta.

Era berean, bileran 2018ko aurrekontua onartu zen, museoaren operatiboari azken hiru ekitaldietan egindakoen mailan dagoen ekarpen instituzionalekin. Arte programazioa ere onartu dute, eta hari eskainitako diru kopurua 2017an baino %5,7 gehiago izango da.

Zentzu horretan, 'Gaur egungo artearen oinarriak' izenburuan biltzen diren erakusketen artean, Henri Michaux pintore belgikarraren inguruko atzera begirakoak sei hamarkadatako esperimentazioa bilduko du, eta 'Chagall. Urte erabakigarriak, 1911-1919' erakusketak jatorri bielorrusiarreko pintore frantsesaren garapen artistiko goreneko garaian egindako lanak bilduko ditu. Horien ostean, Thannhauser Bilduma izango da Guggenheim Fundazioarekin sinatutako kudeaketa hitzarmenean jasotako bigarren erakusketa.

Sorkuntza txinatarra

Aldi baterako erakusketei dagokienez, arte sorkuntza garaikide txinatarrari eskainitako erakusketa bat izango da, bai eta Alberto Giacometti eskultore suitzarrari buruzko atzera begirako zabala ere.

Azkenik, 2018an emakume artistei eskainitako bi erakusketa hartuko ditu 'Gaur egungo artearen zertzeladak' atalak: Esther Ferrer donostiarra eta Joana Vasconcelos portugaldarrarenak. Horiekin batera, garai digitalean artearen eta arkitekturaren artean dauden loturei eskainitako 'Architecture Effects' erakusketa izango da, eta Film & Video aretoan ikusgai izango diren Michael Snow, Diana Thater eta Javier Tellezen bideosorkuntzekin osatuko da programazioa.

Azkenik, Batzorde Betearazleak eta Patronatuak 2018-2020 Plan Estrategikoa onartu dute, museoak 2009an ezarritako Asmoa 2020 betetzeko helburua duen azken plana. Testuinguruaren analisitik eta erakunde eta babesleen ordezkarien eta museoko zuzendaritza taldearen parte hartzearekin, datozen hiru urteetarako helburu, helmuga eta ekimen estrategikoak definitu dituzte.

Temas

Euskera

Contenido Patrocinado

Fotos

Vídeos