https://static.elcorreo.com/www/menu/img/zurekin-desktop.jpg

Gaur hasi da, Ikasle Egunarekin batera, Durangoko Azoka

Ume batzuk, gaur, Durangoko Azokan./Maika Salguero
Ume batzuk, gaur, Durangoko Azokan. / Maika Salguero

Gune guztiak zabalik daude, eskaintza sorta zabalarekin. Landakon hainbat aurkezpen egingo dira egun osoz, eta jarduerak ere badaude gaurko aurreikusita, kontzertuez gain

AMALIA IBARGUTXI

Landako gunea zabalik dago, disko eta liburu nobedadeez beteta. Gaur, hilak 5, hasi eta igandera bitarte, abenduak 9, egongo da zabalik eta puri-purian, Durango guztia. Durangoko Azokako 53. edizioan, kulturzaleek 200 ekitaldiz osatutako egitarauaz gozatu ahal izango dute, Azokako zazpi guneetan. Landako gunean, 247 erakusmahai izango dituzte, 439 nobedaderekin: 304 liburu, 93 disko, eta bestelako 18 aldizkari eta abarrekin.

Ikasle Eguna da gaurkoa, baina ateak zabalik daude adin guztietako jendearentzat. Ikasleek eurek zabalduko dute ate nagusia, goizeko 10:30ean, eta arratsaldeko 7etako irekiera ekitaldian erakunde publikoetako ordezkariek hartuko dute parte. Gainera, aurtengo edizioko kartelaren egileek, Txakur Gorria sormen kolektiboko kideek, 'Digara' ikuskizun laburra eskainiko dute.

Euskal Herri osoko ikasleek kulturaren plazako zazpi guneetan izango dute zer ikusia eta zer entzuna. Gainera, disziplina ezberdinetako tailerretan ere parte hartu ahalko dute. Literatura, musika, antzerkia, ikus-entzunezkoak eta, oro har, sorkuntzaren mundura hurbildu ahal izango dute haur eta gazteek. Azokako zortzi guneez gain, Durangoko liburutegian, eta Arte eta Historia Museoan ere izango dira jarduerak.

Ikasle ez direnek ere izango dute non aukeratu proposatutako jarduera-agendan. Landako gune barruko Areto Nagusian, adibidez, hainbat proiektu eta aurkezpen egingo dira, 13:30etik aurrera. Lehenago, goizeko 11:00etan Ahotseneko musika eta literatur maratoiari ekingo diote. Zuzenekoen karpan hasiko dira kontzertuak. Josu Bergara eta Eneritz Furyak bakarlariak egongo dira, Gatom rap abeslari bermeotarra, lehenengo diskoa kaleratu duten Azalera, Dunne eta Polybius taldeak, eta baita ibilbide luzeagoa dutenak ere. Halaber, euren lan berriak aurkeztuko dituzte Thierry Biscary, Jasone Osoro, Aritz Gorrotxategi eta Karlos Linazasoro idazleek.

Kabi@, Landako barrura

Aurten Landako barruan izango da Kabi@n gunea. Bertan, arratsaldez, 'Teknologia eta hezkuntza formala eta informala'-ren inguruan hausnartuko dute, hainbat parte-hartzailerekin. Saguganbaran, Pirritx, Porrotx eta Marimototsek disko liburua aurkeztuko dute, eta gero, 19:00etan, 'Maritxipi eta Amatxo' liburua ere aurkeztuko da.

Irudienean (Zugaza zine aretoetan) hiru ikus-entzunezko lan aurkeztuko dira. Lehenengo, 17:00etan 'Atsolorra' film laburra; 17:30ean 'Sarkor, garena gara' Sarkor musika taldearen inguruko dokumentala; eta 19:00etan 'Gu, Laboa' Mikel Laboaren inguruko dokumentala, bere heriotzaren 10. urteurrena dela eta.

Egunero bezala, Azokako egitaraua Plateruenan amaituko da. Kafe Antzokiko eszenatokia Huntza taldeak estreinatuko du, 23:00etan. Taldeak bere bigarren diskoa aurkeztuko du, 'Xilema'.

Durangoko Azoka 2018

 

Fotos

Vídeos