https://static.elcorreo.com/www/menu/img/zurekin-desktop.jpg

Habanera jaialdia heltzear dago Getxora

Habanera jaialdia heltzear dago Getxora

Bertan, Peix Fregit eta Mestre D'Aixa taldeak eta Itxartu eta Ondarreta abesbatzak arituko dir

EL CORREO

Ostiraletik igandera arte, habanerak eta itsas doinuak izango dira protagonista nagusi Getxon. Izan ere, 33. Habanera Jaialdia ospatuko da Muxikebarri zentroko Ereaga aretoan, eta, bertan, Peix Fregit eta Mestre D'Aixa taldeak eta Itxartu eta Ondarreta abesbatzak arituko dira. Saioak 19:30ean izango dira, eta, antolatzaileek nabarmendu dutenaren arabera, sarrerak eta abonamenduak salgai daude Algortako eta Romoko Kultur Etxeetan eta Kutxabanken salmenta sarearen bitartez.

Hortaz aparte, gogorarazi dute Peix Fregit taldeak zabalduko duela jaialdia ostiralean. Baina zer aurkituko dute interesdunek bertan? Osaketa klasikoa duen habanera hirukotea da Peix Fregit ahotsa, gitarra eta akordeoia erabiltzen dituena. 1974. urtean sortu zen Palafrugellen, Gironan, eta ordutik hona hainbat saio eskaini ditu Espainian zein atzerrian. Habanera jaialdi eta cantada garrantzitsuenetan parte hartu du eta 15 disko baino gehiago grabatu dituzte; horietako azkena 'Tal com sona' du izena.

Larunbatean, berriz, Mestre D'Aixa jardungo da. Ekitaldiaren arduradunen arabera, 1981. urtean Vilassar de Mar-en auzo jai baten ondorioz sortutako talde hau garatuz joan da gaur egun duen profesionalizazio maila izateraino. Gauzak horrela, azkeneko urte hauetan taldearen egituran aldaketak izan diren arren, oinarrizko osaketa mantendu izan da, ahots mistoek, akordeoia, gitarrak eta perkusio elementuez osatua. Taldearen berezko estiloak habanera eta itsas-erritmoak kanta herrikoi eta tradizionalekin konbinatzen du, eta aldi berean bide berriak uztartzen ditu konposizio propioekin eta katalanez abestutako musika pieza ezagunen moldaketekin.

Azkenik, igandean, jaialdia amaituko da saio bikoitza eskainita. Horretan bertoko bi talde ariko dira, ahots mistoen Itxartu eta Ondarreta abesbatzak, Jesús Antruejok eta Iñaki Morenok zuzenduta, hurrenez hurren. Biek erakutsiko dute zein ondo moldatzen diren itsas doinuak abesten eta zer nolako errotze indartsua duten kanta horiek gure herrian. Ez ezazue pentsa eta anima zaitezte.

Temas

Euskera