Gontzal Mendibil eta Iñaki García Uriberen 'Kontuak eta kantuak' ikusgai, ostegunean, Aramaion

Gontzal Mendibil musikariak eta Iñaki García Uribe etnografo eta ikertzaileak sortu duten 'Kontuak eta kantuak' izeneko proiektua ikusteko eta entzuteko aukera egongo da ostegunean Aramaioko Kultur Etxean. Proiektu honek musika eta literatura bateratzen ditu, eta dagoeneko Arabako bederatzi herritan aurkeztu dute. Emanaldia 18:30ean izango da.

Proiektu honekin hamar hiletan hamar emanaldi prestatu dituzte, eta beraz, Aramaiokoa azkena izango da. Arabako mendirik garaiena den Gorbeiako mendiari buruzko narrazioak eta kondairak dira. Ikuskizunak gutxi gorabehera ordubete eta laurden irauten du, eta Gontzal Mendibilek Gorbeiari buruz konposatu dituen abestiak eta García Uribek mendi berari buruz bildu dituen narrazioak tartekatzen dira.

Gontzal Mendibilek lau hamarkada daramatza bakarrik abesten, eta hamazortzi urterekin igo zen lehen aldiz agertokira, eusko abertzaletasunari eta herri mugimenduari abesteko. Handik urtebetera lehen diskoa kaleratu zuen, 'Zaurietatik dario' izenekoa. Harrezkero beste hamabost disko plazaratu ditu. Azkena, 'Gau magikoa' izenekoa, iazkoa da, eta Gontzal Mendibilekin batera, Easo Txiki abesbatza eta Easo abesbatza aritu ziren.

Eleberrigintzan ere aritu da, izan ere, 2005. urtean 'Gorbeiako haizea' izeneko eleberria argitaratu zuen Keinu argitaletxearekin, berriki hil zitzaion bere aitaren omenez. Bestalde, Ainara Maia Urroz olerkariaren 2012ko 'Hatsaren poesia' olerki-liburuko hiru olerki hauei musika jarri zien: 'Itxaropena bihotzarentzat', 'Egidazu toki bat' eta 'Noizbait'.