https://static.elcorreo.com/www/menu/img/zurekin-desktop.jpg

Gernikako bonbardatzea ikertutako historialariek jasoko dute Gernika Saria

Gernika 1937ko bonbardaketaren ostean./Biblioteca Nacional
Gernika 1937ko bonbardaketaren ostean. / Biblioteca Nacional

Gernika-Lumoko udalak nabarmendu duenez, bertan gertatutako erasoaren ukapena «Europako inoizko iruzurrik luze eta handienetarikoa da», eta horregatik egin nahi diete aitortza

AMALIA IBARGUTXI

Paul Preston, Angel Viñas eta Xabier Irujo historialariek jasoko dute aurtengo Gernika Saria, udalerri horretako bonbardatzearen inguruan burututako lanak aitortzeko. Izan ere, Gernika-Lumoko udalak nabarmendu duenez, bertan gertatutako erasoaren ukapena «Europako inoizko iruzurrik luze eta handienetarikoa da».

Historialariek gatazka armatuetan duten pisua nabarmendu nahi izan dute historialarion lana sarituz, «narratiba historikoan oso arruntak direlako iruzur eta faltsutzeak».

Bakearen eta Berradiskidetzearen aldeko XV. Gernika Saria emango diote, baita ere, Christos Stylianides Laguntza Humanitario eta Krisien Kudeaketarako Europako Batzordeko komisarioari. Jordaniako errefuxiatu eremuetan egindako lanengatik nahi dute saritu. 2014. urtetik, 40.000 lagun inguru igaro dira bertatik.

Gernika-Lumoko eta Pforzheim-eko (Alemania) udalek, Gernika Gogoratuz fundazioak, Kultur Etxea fundazio publikoak eta Gernikako Bakearen Museoak antolatu eta ematen dituzte urtero Gernika sariak, udalerriarekin zerikusia duten elkarte edo erakundeek proposatutako hautagaien artean aukeratuta batzorde batek.

Emakume eta adin txikikoen salerosketak

Daniel Barenboim musikari eta orkestra zuzendari israeldarrak eta Helena Maleno giza eskubideen aldeko ekintzaile andaluziarrak jaso zuten iaz saria. Israeldar eta palestinar nazionalitatea dituen lehen hiritarra da Barenboim, eta bakearekiko erakutsitako konpromisoagatik hautatu zuten. Maleno ekintzaile, kazetari eta ikertzaile andaluziarrak, bestalde, migratzaileen aurkako indarkeria kasuak dokumentatu ditu eta ehunka ikerketa ireki ditu emakume eta adin txikikoen salerosketak salatuta.

Aurreko urteetan saritu dituzte, besteak beste, Juan Manuel Santos Calderon Colombiako presidentea, Rodrigo Londoño Echeverri FARCeko liderra eta Gervasio Sánchez fotokazetaria; José Mujica Uruguaiko presidente ohia eta Francisco Etxeberria Aranzadiko antropologoeta burua; eta Manu Leguineche kazetaria eta John Wynne AGF Armada Gorriaren Frakzioko pilotu izandakoa.

Temas

Euskera