GazteFilmek txikientzako 40 jarduera dakartza
Proiekzioak, tailerrak eta kontzertuak 12 urtetik beherako gazteei zuzenduta
leire larrazabal
Osteguna, 17 azaroa 2022
GazteFilm zinema jaialdia Gasteizko zenbait espaziotara zabalduko da, ostiral honetan hasi eta datorren azaroaren 27ra arte. Proiekzioak Zabalganako Gizarte-Etxearen eta Artiumen artean banatuko dizute, eta, lehen aldiz, zinema-jaialdia Salburuko Gizarte Etxera iritsiko da. Orotara, 40 jarduera inguru eskainiko ditu (proiekzioak, tailerrak eta kontzertuak), jasotako 800 proposamen baino gehiagoren artean.
Seigarren edizio hau berritasunekin dator. Horrela, jaialdiko bi asteburuak batez ere 12 urtetik beherako gazteei zuzenduta egongo dira. «Txikienei programazio zabalagoa eta osoa ikusteko aukera gehiago emateaz gain, ikusle gazteenekin beste era batera, denborari dagokionez jarraian lan egiteko aukera izango dugu. Hala, haiei gustatzen zaien programazioa elkarrekin diseinatzeko elkarrizketak eta esperientziak finkatuko ditugu», kontatzen du Helena Gonzalez jaialdiaren zuzendarikideak.
Bestetik, laugarren urtez jarraian, GasteFilm Fest jaialdiko programazioaren zati bat online egongo da ikusgai filmin.es plataforman, abenduaren 2tik 9ra bitartean. Gainera, ohikoa den moduan, abenduan, jaialdiko lehiaketako atalaz gozatzeko aukera izango dute Arabako hainbat udalerritan: Zigoitian, Agurainen eta Laudion, adibidez. Aurten, gainera, Oioneko Bitartean Jolasean elkarteari esker, GazteFilm Fest Arabar Errioxako bost herritara ere egingo du jauzi.
Emanaldietako sarrerek 3,50 euroko prezioa izango dute, eta GazteFilm Fest jaialdiaren webgunean eros daitezke, edo proiekzioa baino ordu erdi lehenago, jaialdiaren egoitzan.
