https://static.elcorreo.com/www/menu/img/zurekin-desktop.jpg

Gasteizek Save The Children-ekiko hitzarmena onetsi ditu

Era berean, udal gobernuak ontzat eman du 'Babesgabetuen Andre Maria' izeneko obra sozialarekin lankidetza-hitzarmena sinatzea

SERGIO EGUÍA

Tokiko Gobernu Batzarrak Save The Children fundazioarekiko lankidetza-hitzarmena onetsi du, 2018an Pilarreko eta Aldabeko gizarte etxeetan eskola arrakasta eta aisialdi eta denbora librea sustatzeko proiektu bat gara dezan.

Gizarte Politiken eta Osasun Publikoaren Sailak 11.724 euro emango dizkio GKEari, pobrezia-egoeran edo gizartetik baztertuta dauden edo arrisku hori duten haurrei laguntza eman diezaien. Arrisku-egoerak prebenitu, gutxitu edo desagerraraztea da helburua, eta pobreziak haiengan eta familiengan izan dezakeen eragina minimizatzea.

Programan parte hartzen duten 6 eta 12 urte bitarteko umeek hezkuntza errefortzua eta ikasteko laguntza jasoko dute, eskolako errendimendua hobetzeko. Aisialdi eta denbora libreko jardueretan hartuko dute parte, gizarte harremanak hobetu eta ohitura osasungarriak eta besteekiko errespetua sustatzeko. Familiei, berriz, orientabideak emango zaizkie etxeko bizikidetza hobetzeko.

Babesgabetuen jantokia

Era berean, udal gobernuak ontzat eman du 'Babesgabetuen Andre Maria' izeneko obra sozialarekin lankidetza-hitzarmena sinatzea, 2018ko urtarrilaren 1etik 2018ko abenduaren 31ra arte jantoki sozialaren programa garatzeko; Udalak gehienez 270.377 euro jarriko du horretarako.

Babesgabetuen gizarte jantokiaren helburua da beren etxean beren kabuz janariak prestatzeko arazo pertsonalak edo sozialak dituzten pertsonei eguneroko otorduak bermatzea.

Gasteizko Udalak hainbat urte daramatza baliabide hori diruz laguntzen. Baliabide ekonomiko gutxiko pertsonek bazkaldu eta afaltzeko aukera dute bertan, oso merke edo doan, udal zerbitzuek edo beste erakunde batzuek hara bideratuta; gainera, aisialdirako ere erabil ditzakete gizarte jantokiaren instalazioak, baldintza jakin batzuetan.

Temas

Euskera

Contenido Patrocinado

Fotos

Vídeos