https://static.elcorreo.com/www/menu/img/zurekin-desktop.jpg

Gasteizek Angulemarekiko senidetzea ospatuko du asteburuan

SERGIO EGUÍA

Gasteizko Udalak Frantziako Angulema hiriarekiko senidetzea ospatuko du beste urte batez, eta otsaileko lehen astebururako hainbat jarduera antolatu ditu, udalerriko sortzaileen talentua ezagutarazteko asmoz. Joan den asteburuan, berrogeita hamar gasteiztar inguru Angulemara joan ziren, bertako Nazioarteko Komiki Jaialdia zuzenean ezagutzera. Oraingoan, aldiz, jarduera programa zabala antolatu da gurean, otsailaren 1ean (osteguna) hasita: Antonio Altarriba idazleak hitzaldia emango du Montehermoso kulturunean, 19.00etan, bi hiriek komikiaren bitartez izan duten eta duten harreman bereziaz.

Larunbatean, otsailak 3, kalera aterako dira jarduerak. Goizeko hamaiketan, bi jarduera egingo dira San Migeleko plazan (Hedegile kalea). Batetik, errealitate birtualezko marrazketa esperientzia: parte-hartzaileek 3D-ko betaurrekoak baliatuz marraztu ahalko dute, oihaltzat irudimena eta pintzeltzat eskuak erabiliz. Sormena eta berrikuntza nahasten dituen ekintza hori Iñaki Amurriok gidatuko du. Ordu berean, Zuloa liburu-dendan, familientzako sorkuntza gune irekia izango da: umeek sormena landuko dute Saludos al Polloren laguntzarekin.

Orobat, komikiz osatutako diru-zorroak egiteko lantegia egingo da Irantzu-tzu dendan (Hedegile kalea, 34). Jarduera 8 urtetik gorakoentzat da, eta beren diru-zorroak egin ahalko dituzte. Lekuak mugatuak izango dira, iristeko hurrenkeran.

Eguerdiko hamabietan, azkenik, ipuin kontaketa berezi-berezia izango da Montehermoso kulturunean, Patxi Zubizarreta idazlearen eta Mintxo Cemillán margolariaren eskutik. Hiru hizkuntza baliatuz, adin orotako pertsonen irudimena piztuko du jarduerak.

Angulemako Komiki Jaialdirako bidaiaren balantze ona

Joan den asteburuan, 48 pertsona Angulemako Nazioarteko Komiki Jaialdira joan ziren, horietako batzuk, Arte eta Diseinuko goi mailako Eskolakoak. Jaialdiko jardueretan parte hartzeaz gain, Gasteizko Diseinu Eskolaren eta Angulemako Irudiaren goi mailako Eskola Europarraren arteko bilerak izan ziren, Erasmus programaren baitan elkarrekin ekintzak koordinatzeko. Gasteiztar taldeak hainbat alderdi nabarmendu ditu Nazioarteko Komiki Jaialdiaren programatik: erakusketen kalitatea, karpetako giroa, erakutsitako arte-ekoizpenaren dibertsitatea, eta emakumeen presentzia gero eta handiagoa.

“50. urteurrena bete zenetik, Angulemarekiko senidetzea indartzen ari gara, sorkuntza-industriak sustatzeko gure estrategiaren oinarrietako bat baita. Ekimen hori, eta beste batzuk, hala nola Film Office biziberritzea, ikus-entzunezkoak ekoizteko laguntza berriak, sektoreko enpresentzako aretoak egokitzea eta profesionalizazioa sustatzeko ekintzak, Gasteizentzat aukera-nitxo garrantzitsua izan daitekeenaren alde egin dugun apustuaren erakusgarriak dira”, adierazi du Enpleguaren eta Garapen Ekonomiko Iraunkorraren zinegotzi Nerea Melgosak.

Bidaiak eta asteburuko jarduerek osatzen dute Angulemarekiko senidetzearekin lotutako 2018ko programa, gure hiriko sortzaileen talentua erakusteko eta udalerriko sorkuntza industria ikusarazteko asmoz antolatua. Interesatuek Gasteizko Udalaren web-orrian kontsultatu dezakete agenda osoa.

Contenido Patrocinado

Fotos

Vídeos