https://static.elcorreo.com/www/menu/img/zurekin-desktop.jpg

Fair Saturday erakundeak 'Berrikuntza Soziala Kulturaren Bidez' jardunaldia ospatuko du astelehenean, Bilbon

Aurtengo ekitaldiak hainbat pertsona esanguratsuren esku hartzea izango du./
Aurtengo ekitaldiak hainbat pertsona esanguratsuren esku hartzea izango du.

Bilboko Guggenheim Museoan ospatuko den ekitaldian hainbat aurpegi ezagunek parte hartuko dute

UNAI SARRIUGARTE

Fair Saturday erakundeak 'Berrikuntza Soziala Kulturaren Bidez' egitasmoa ospatuko du astelehenean Bilbon. Bilboko Guggenheim Museoan ospatuko den ekitaldian hainbat aurpegi ezagunek hartuko dute parte. Ekimen honen III. edizioan edonork har dezake parte eta sarrera doakoa izango da. Guztira hamaika hitzaldi eskainiko dira.

Aurtengo ekitaldiak hainbat pertsona esanguratsuren esku hartzea izango du: Antonio Garrigues espainiar abokatu eta humanista, Lita Cabellut margolaria, Eskoziako migrazio eta garapen internazionaleko Europarako ministroa den Ben MacPershon, Manuel Veiga Lisboako Kultura zuzendaria, Ana Isabel González Fundacion vocesen lehendakaria besteak beste.

Egitaraua goizeko 09:00etan abiatuko da Bizkaiko Euskara eta Kulturako foru diputatua den Lorea Bilbaoren ongietorriarekin. Ondoren, Fair Saturday elkartearen sortzailea den Jordi Albareda bizkaitarrak ekitaldiaren aurkezpena egingo du.

Aurtengo gonbidatuen hitzaldiak 09:20ak aldera hasiko dira. Hitzaldi bakoitzak 20 minutu inguru iraungo ditu. Lehendabizikoa Ben Macphersonek eskainiko du. 'Brexiten garaian, kulturak batasun bideak jorratzea posible litzateke?' da bere konferentziaren izenburua.

Atsedenaldia 11:00etatik 11:30etara bitartean izango da. Kafearen ondoren, Alison Woodsek ekingo dio ekimenari 'Posible al da elkar ulertzea hizkuntza bera hitz egiten ez dugunean?' aurkezpenaren bitartez. Aurtengo edizioaren itxiera hitzaldia Antonio Garrigues madrildar abokatu humanistak eskainiko du. 'Kulturarik gabeko demokrazia posible litzateke?' gaiaren inguruan hitz egingo du bere mintzaldian.

'Berrikuntza Soziala Kulturaren Bidez' egitasmoak hainbat enpresa eta erakunde publiko nahiz pribaturen laguntza jaso izan du: Bizkaiko Foru Aldundia, Bilboko Udala, Laboral Kutxa, Petronor, Bilbao Aseguruak eta Tamoin.

Guztion onurarako eguna

Fair Saturday eragin soziala duen nazioarteko mugimendu kulturala da, azaroaren azken larubatean ospatzen dena, Black Friday-aren hurrengo egunean. Bizi garen zalantzazko testuinguru honetan, oso garrantzitsua da etorkizun hobeago batentzat kultura eta enpatia soziala nahitaezkoak direla azpimarratzea.

Egun honetan mundu osoko kultur eragileek bat egiten dute ekimenean parte-hartuz, euren aukerako proiektu sozial bati laguntza eskainiz. Urteak aurrera egin ahala, gero eta herrialde gehiago ari dira atxikitzen Fair Saturday egitasmora. Erakunde kultural eta sozialek egiten duten lana azpimarratu eta sentitzeko ekimena da, guztion onurarako eguna.

Dagoneko egindako edizioetan 11 herrialdetako 189 hirik hartu dute parte. Bertan musika, dantza, antzerkia eta hainbat dizpilinatako 10.000 artista izan dira, 200.000 pertsona baino gehiago erakarriz. Fair Saturday ekimenak 1.000.000 euro baino gehiagoko inpaktu sozial eta kulturala eragin du azken edizio hauetan.

.