https://static.elcorreo.com/www/menu/img/zurekin-desktop.jpg

Eusko Jaurlaritzak landa eta itsasertze garapenerako 15 proiektu diruztatu zituen iaz Busturialdean

Eusko Jaurlaritzak landa eta itsasertze garapenerako 15 proiektu diruztatu zituen iaz Busturialdean
E.C.

Ekimen hauetara 360.000 euro inguru bideratu ziren

UNAI SARRIUGARTE

Eusko Jaurlaritzak landa eta itsasertze garapenerako 15 proiektu diruztatu zituen iaz Busturialdean (Bizkaia). Bertara 360.000 euro inguru bideratu ziren. Egitasmo hauek Urremendi Landa Garapeneko Elkartearen laguntza eta aholkularitza jaso izan dute.

Pasa den astelehenean, uztailak 29, Bittor Oroz Eusko Jaurlaritzako Nekazaritza, Arrantza eta Elikagaien Politikako sailburuordea Landa Garapeneko Elkarteko, Busturialdeko erakundeetako ordezkariekin eta inguruko udalerrietako alkateekin elkartu zen. Bertan Leader, Erein eta Itsaspen ekimenaren bitartez eta proiektu soziokulturaletarako programaren bitartez bideratutako diru-laguntza publikoarekin egiten diharduten landa ekimenen nondik-norakoak ikuskatu zituen.

Urremendi Landa Garapenerako Elkarteak kudeatzen du Jaurlaritzak emandako laguntza ekonomikoa. Elkarte honek Busturialde eskualdeko landa eremua garatzen laguntzea du xede. Eskualde hau honako herri hauek osatzen dute: Ajangiz, Arratzu, Bermeo, Busturia, Ea, Elantxobe, Ereño, Errigoiti, Forua, Gautegiz-Arteaga, Gernika-Lumo, Ibarrangelu, Kortezubi, Mendata, Morga, Mundaka, Murueta, Muxika, Nabarniz eta Sukarrieta.

Urremendik hainbat jarduera jorratzen ditu urtero Busturialdean. Batez ere interes berezia jartzen du instantzia administratibo guztiek bultzatutako landa eta itsasertzeko guneen garapenerako programen kudeaketan.

Hiru programa ezberdin hauen bitartez hainbat egitasmo diruztatu ziren pasa den urtean. Erein programak iaz 59.355 euro bideratu zituen diru-laguntzetara. Leader programak, berriz, bederatzi proiektu lagundu zituen ekonomikoki 2018. urtean, bost publiko eta lau pribatu. Guztira, 214.600 euro banatu zituen laguntza ekonomikoetan. Azkenik, Itsaspen programaren barruan bi proiektuk jaso zuten diru laguntza pasa den urtean. Diru-laguntza hau 76.340 eurokoa izan zen.