https://static.elcorreo.com/www/menu/img/zurekin-desktop.jpg

Euskarazko nazioarteko tesiak bikoiztu ziren iaz

Euskarazko Tesien VI. Koldo Mitxelena sariak banatzeko ekitaldia ospatu zuten asteazkenean./Euskaltzaindia
Euskarazko Tesien VI. Koldo Mitxelena sariak banatzeko ekitaldia ospatu zuten asteazkenean. / Euskaltzaindia

Guztira, Euskal Herriko Unibertsitatean 33 tesi defendatu ziren 2018an

EL CORREO

Euskaraz egindako 33 tesi defendatu ziren iaz, Euskal Herriko Unibertsitatean. Hala jakinarazi dute asteazken honetan EHUko eta Euskaltzaindiko ordezkariek, Euskarazko Tesien VI. Koldo Mitxelena sariak banatzeko ekitaldian. Hortaz aparte, nabarmendu dutenaren arabera, horietatik 17 nazioartekoak izan ziren, aurreko urteko kopurua bikoiztuz.

Sariak antolatzen dituzten bi erakundeen izenean, Andres Urrutia euskaltzainburua, Nekane Balluerka EHUko errektorea, Adolfo Arejita Iker sailburua eta Jon Zarate EHUko Euskararen eta Etengabeko Prestakuntzaren arloko errektoreordea izan ziren. Zehazki, Euskarazko Tesien VI. Koldo Mitxelena sariak banatzeko ekitaldia, Euskaltzaindiaren Bilboko egoitzan ospatu zen.

Bost jakintza arlotan banatzen dira sari hauek: Zientziak; Ingeniaritza eta Arkitektura; Osasun Zientziak; Gizarte eta Lege Zientziak, eta Artea eta Giza Zientziak. Hurrenez hurren, hauek izan dira sarituak: Asier López, Olatz Pérez de Viñaspre, Mikele Macho, Juan Mari Aguirreurreta eta Miren Ibarluzea. Diploma eta 2.000 euroko diru kopurua jaso ditu bakoitzak.

EHUk eta Euskaltzaindiaren Iker Sailak 2008tik antolatzen dute sari hau elkarlanean. Bi urtean behin egiten da deialdia, eta egitasmoaren sustatzaileek euskarazko tesien ekarpen bikoitza goraipatu izan dute hasieratik: batetik, jakintzaren arloa zabaltzen laguntzen dutelako, eta, bestetik, euskararen normalizazio prozesuan guztiz lagungarriak direlako.

Nazioarteko kalifikazioa, euskaraz

EHUko errektoreak adierazi duenez, «zientzian, beste hainbat diziplinatan bezala, kantitatea baino garrantzitsuagoa da kalitatea. Euskarazko doktoretza tesien artean gero eta tesi gehiagok lortzen dute nazioarteko kalifikazioa. Horrek zer esan nahi du? Batetik, ikerketa egin duenak egonaldia egin behar izan duela atzerriko beste unibertsitate batean; bestetik, tesiaren laburpen sakon bat komunitate zientifikoak erabilitako hizkuntza batean publikatuko dela, hau da, ingelesez zabalduko dela».

Bestalde, EHUko eta Euskaltzaindiako ordezkariek euskarazko ikerketaren garrantzia ere nabarmendu dute, eta, horrez gain, dibulgazioaz hitz egin du Arejitak bere agerraldian: «Ikerkuntza premiazkoa du gizarte batek, aurrera egingo badu. Gizarte horren premia eta eskakizunei erantzungo dien ikerkuntza behar du, etorkizunaren zibuzabu eta noraezen aurrean urratsa ziur eta sendo emateko. Beraz, gure gizartearen premiei egoki erantzungo dien ikerkuntza behar dugu, eta gizartearen esku ipini».

Bere hitzetan, «euskal hizkuntza gizarte fenomeno bat den bezala, ikerkuntzak ere gizarteari irekia eta haren mesedetan bideratua behar du izan, ez altxor gisa gorderik iraungo duen zerbait. Ikertzen den oro, baliokoa den bezanbatean, dibulgatzekoa da, eta horixe da, besteak beste, sarion bidez bilatzen dena».

Sarien irabazleak eta euren lanak

Zientziak kategorian, Asier López izan da irabazlea, 'Eremu-teorien eta eredu analitikoen bidezko defektu kosmikoen ezaugarritzea' tesiarekin, eta Ingeniaritza eta Arkitektura sailean, Olatz Pérez de Viñaspre, 'Osasun-alorreko termino-sorkuntza automatikoa: SNOMED Ctren eduki terminologikoaren euskaratzea'.

Halaber, Osasun Zientziak kategorian, Mikele Machoren 'Herpes genitalaren ikerketa epidemiologiko, kliniko eta mikrobiologikoa Bilbo hirian' tesia izan da irabazlea, eta Gizarte eta Lege Zientziak sailean, Juan Mari Aguirreurretak irabazi du saria, «Fikzioa J. P. Sartreren diskurtso teorikoan: fikzioaren antolamendua L'Etre et le Neant obra filosofikoaren 'Begirada kapituluan' tesiarekin.

Azkenik, Artea eta Giza Zientziak kategoriako irabazlea Miren Ibarluzea izan da, 'Itzulpengintzaren errepresentazioak euskal literatura garaikidean: eremuaren autonomizazioa, literatur historiografikoak eta itzultzaileak fikzioan' tesiari esker.

SARITUAK

Temas

Upv, Euskera