https://static.elcorreo.com/www/menu/img/zurekin-desktop.jpg

Euskarazko B1, B2, C1 eta C2 mailak egiaztatzeko deialdi irekian izena emateko epea zabaldu dute

Iaz, 3.076 lagun aurkeztu ziren proba hauetara, eta %38,32k gainditu zuten

EL CORREO

HABE erakundeak ostiral honetan zabaldu du euskarazko B1, B2, C1 eta C2 mailak egiaztatzeko deialdi irekian izena emateko epea. Parte hartzeko interesa dutenek irailaren 25era bitartean eman ahal izango dute izena, habe.euskadi.eus atarian. Iaz, 3.076 lagun aurkeztu ziren proba hauetara, eta %38,32k helburua lortu zuten.

Eusko Jaurlaritzako Kultura eta Hizkuntza Politika Sailak jakinarazi duenez, deialdiaren bidez gaitasun mailak egiaztatzeko bidea erraztu eta zabaldu nahi die interesa duten herritar guztiei. HABEk egiaztatzen dituen maila hauek Europako Erreferentzia Markoak adierazitakoaren baitan bideratuak dira, eta ekimen honekin herritarrei bere gaitasun maila era irekian ere egiaztatzeko aukera eskaini nahi zaie.

Iazko udazkenera arte ezinbestekoa zen euskaltegietako ikastaroren batean izena emanda izatea C1 (lehengo HABE 3, Hezkuntza Sailak kudeatzen duen EGAren eta Administrazioko hirugarren hizkuntza eskakizunaren baliokidea) eta C2 (lehengo HABE 4 eta Administrazioko laugarren hizkuntza eskakizunaren baliokidea) mailak HABEren ziurtagirien bitartez egiaztatzeko. Azken urteotan, baina, deialdi irekia zabaltzen joan da, harik eta egiazta daitekeen mailarik altuenera iritsi arte (C2 mailara).

Deialdi honetan matrikulatu ahal izateko gutxienez 17 urte izan behar dira edo 2018an bete. Gainera, interesduna bi gaitasun mailetarako matrikula daiteke, gehienez ere, eta matrikula egoki egin eta jarritako epean ordaindu beharko du.

Horrez gain, gaitasun proba hauetan parte hartzeko azterketariak ondoko baldintza hauek bete behar ditu: matrikula behar bezala bideratzea, azterketa eskubideak ordaintzea, azterketa egunean ordurako bertan izatea, eta azterketako arduradunaren aurrean identifikatzea, nortasun agiri edo agiri ofizial baliokideren bat aurkeztuz.

Internet bidez

Izen-ematea Internet bidez bideratuko da, habe.euskadi.eus atarian «sarbidea» atalean klik eginez. Noizbait euskaltegiren batean ibilia izanez gero, izena eman nahi duenak «erabiltzailea» eta «pasahitza» izango ditu. Inoiz euskaltegiren batean ibili ez direnek, HABEn erregistratzeko aukera izango dute eta jarraian izena emateko inprimakia bete beharko dute.

Matrikula ordaina 60 eurokoa izango da maila bakoitzeko. Maila batera baino gehiagora aurkeztu nahi duen azterketariak zenbat matrikula, hainbat matrikula ordain egin beharko ditu, baina jakin behar du egun, ordu eta leku berean bateratu ahalko dituela HABEk hainbat mailetako azterketak, matrikulazio kopurua eta azterketak egiteko behar diren baliabideak kontuan hartuta.

Matrikula egiteko epea itxi eta hamar egun baliodunen epean emango du argitara HABEk habe.euskadi.eus atarian deialdi hau burutzeko maila bakoitzerako aurreikusitako egutegia: onartuen zerrenda argitaratzeko data, probak egiteko egunak eta lekuak, eta proben emaitzak jakinarazteko datak.

Temas

Euskera

Contenido Patrocinado

Fotos

Vídeos